طيب اختي مدام تبينها بالتفصيل ركزي والله يعينك ..
اولا القرار هذا صدر لخدمة حالتك اخت مادونا لأنك قبل القرار ما كنتي تقدري تنقلي كفالة زوجك عليك وانتي موظفه حكوميه ..
الان فرجت .. تقدري تنقلي كفالة زوجك عليك حتى لو كنتي موظفه حكوميه وما عندك سجل او نشاط تجاري
عموما النقل بيتعبك شوي والله يعينك تتحملي واتبعي التالي ولا تهملي شئ منه ..
اول شئ يحصل زوجك على تنازل مصدق من كفيله الحالي
لك انتي موجه بإسمك الشخصي حسب بطاقة الأحوال
تاخذي التنازل ومعاه التالي :
هويتك بطاقة الأحوال وصورتين منها ..
جواز زوجك وصورتين ..
اقامة زوجك وصورتين ..
عقد النكاح وصورتين ..
صورتين من التنازل ..
تعبي استمارة جوازات لنقل الكفاله وتحطي فيها صورة زوجك
وتصوريها صورتين ..
وتروحي القسم النسائي بجوازات الرياض
زحمه وقروشه وحوسه
المهم تقدمي الأوراق للموظفه
راح تتأكد من بطاقتك وصورتك واصول الأوراق
واذا تأكدت منها راح تختم لك وتوقع على الإستماره والصور
انها طبق الأصل
بعدها
اذا اخذت منك الأوراق بتعطيك موعد مراجعه
واذا اعطتك الأوراق اطلعي واعطيها لزوج
يروح قسم الرجال يكملها بنفسه
اذا اخذت الأوراق ما قدامك الا انك تراجعيها في
الموعد اللي راح تحدده لك الموظفه
اذا اخذها زوجك يروح لقسم نقل الكفالات
خلف الجوازات مبنى صغير جنب المواقف من الجهه الجنوبيه للجوازات
اول شئ يروح لشباك تعديل المهنه موظف اسمه بن بطاح
وبعدها يروح لشياك الإنتاج نقل الكفاله وراح يستلم اقامته منقوله
وصلى الله على سيدنا محمد ..
طبعا لا تنسي تسددي رسوم نقل الكفاله قبل كل شئ
عن طريق بطاقة صرافك الشخصيه
وتسددي الف ريال تعديل مهنه
ولا تنسي تفعلي حسابك في خدمة ابشر
عن طريق الصراف وتفعلي حسابك في بوابة وزارة الداخليه
وبكذا تكوني كملتي كل شئ يخص موضوع ( زوج مواطنه )
وأخيرا مجرد اقتراح لو قدرتي حاولي تسوي معاملتك في
جوازات الخرج اخف زحمه ويخلصون بنفس اليوم
واذا ما تمت مو مشكله ارجعي لجوازات الرياض ..
دعـــــــــــواتــــــــــك
