أريد الحصول على الجنسية السعودية

Question

السلام عليكم ورحمة الله وبركاته، كيف حالكم إن شاء الله بخير ؟

إخوان أنا من العراق مقيم في السعودية وعمري 21 سنة وفي شهر أبريل راح يكون 22 سنة، حبيت أسألكم عن كيفية الحصول على الجنسية السعودية لأني بصراحة أرغب فيها ولكن ما أعرف من وين أبدأ. للأسف الشديد ما في أحد أسأله عن الجنسية والكل يقول صعبة ويبوني اصبر بس أنا ما أهتم بالكلام السلبي وأنا متأكد 100% أن في ناس حاصلين على الجنسية بأي طريقة كانت ولكنا لا نعرفهم ولا أحد يجيب طاريها.

أهلي قدموا على الجنسية من أكثر من 20 سنة وكنا على وشك الحصول عليها لكن وزير الداخلية رفضها بدون أي سبب، وإلى يومكم هذا لم نحصل على أي شيء وكل ما أقول لأهلي "خلينا نقدم مرة ثانية" يقولون "معاملتنا عندهم وراح ينادونا" وإذا أعيد السالفة يقولون "مرة صعبة وتاخذ وقت". والله يا إخوان يا ليت أحد يساعدني أو عنده أي خبرة لأني بإذن الله ناوي أقدم عليها وأحصل عليها وأكون شخص ينفع الناس وأساعدهم ولا أشوه سمعتي بأي شكل كان.

صحيح أنا طولت بالكلام لكن والله العظيم هذا شيء مهم بالنسبة لي ولا أفكر أرجع للعراق بسبب الأوضاع ولا أفكر باللجوء، وكل ما أقول لأهلي لازم تحطيم ويبوني أركز في دراستي ولا أعطي اهتمام بالموضوع بس أنا حاب أقدم عليها وإن شاء الله الأمور سهلة. ممكن مساعدة يا إخوان الله يخليكم وأنا من قبل حاب أكلم أي شخص يعرف عن الجنسية ويقولي تفاصيلها ويساعدني للحصول عليها.

وفقكم الله لكل خير.

Comments

والله يا اخوي ما ودي احطمك لكن اعرف ناس من عائلة وحده كلهم سعوديين ما عدا واحد فقط غير سعودي وهم اخوان من أم وأب وفي عائلة كلهم غير سعوديين واثنين منهم سعوديين اخذوها زمان بطريقة رسمية وايضاً ابناء المواطنات ما يحق لهم أخذ الجنسية وأيضاً زوجات المواطنين مايحق لهم الجنسية.

اللي أبغى أوصل له إن اللي ذكرتهم هم أولى بالجنسية وما أستطاعو ياخذوها فما بالك باالشخص العادي ؟
قبل 25 سنة تقريباً كانت الأمور سهلة نوعاً ما وزوجة المواطن تاخذ جنسية زوجها لكن الآن الوضع أصعب مما تتخيل
ااخيراً نقول الله يسهل الامور ويوفقنا جميعاً لكل خير ..

---

شكرا لك أخي على الرد الجميل، فعلا عندنا شخص نعرفه من زمان كل أهله متجنسين إلا هو الوحيد ما متجنس ولا ندري شنو السبب، وللأسف الشديد عندنا أقارب حاصلين على الجنسية السعودية ولا نعرف كيف يكونون وساطة مثلا أو يقدورن يجنسونا. أنا ما أدري ليش مصعبينها كأن لغز ما أحد يعرف يحله يعني على الأقل جنسوا إللي يستاهلون مثل المواليد أو إللي يقدر ينفعهم بمشروع أو فكرة ممكن تحسن من الاقتصاد لكن للأسف كل شيء صعب ولا نقدر نسوي شيء. إن شاء الله خير لكن إذا اشتدت الصعوبة احتمال كبير نروح لجوء لتركيا أو أمريكا أو كندا أو أي دولة أوروبية ممكن تفيدنا، وحتى خالتي إللي بكندا تقول تعالوا عندنا بس ما في مكاتب لجوء بالسعودية، لو في كان من زمان قدمنا ورحنا لأي دولة نستفيد منها مع إني تربيت في السعودية بس للظروف لازم تروح مكان ثاني تتربى فيه.

Answer 1

اخوي اذا اوضاعك المالية جيدة فأشتري اقامة مميزة وريح بالك ’ الجنسية صعب جدا الا بأمر ملكي من الديوان او قرار وزاري ادخل جريدة ام القرى تحصل جنسيات

Comments

الله يعطيك العافية أخوي، للأسف الشديد أوضاعنا المالية ليست جيدة وأسوأ شيء أن ما في أحد يشتغل ولا عنده مشروع على الأقل تجيبله فلوس حتى يرتاح وكل شوي دافعين مبالغ لو تدري عنها كان راح تنصدم بقوة. بالنسبة للإقامة الدائمة سعرها مرة مبالغ فيه مع احترامي للي حطاها بس ما أملك ربع هذا المبلغ حتى أحصل عليها وصراحة حياتنا مرة متلخبطة ولا نعرف شنو نسوي، مرة فكرنا باللجوء قالوا صعبة، ومرة فكرنا نرجع للعراق قالوا الأوضاع صعبة ومخيفة، ومرة فكرنا بمشروع على الأقل يمشي أوضاعنا قالوا يبيلنا فلوس، يعني ما أدري كل ما فكرنا بشيء لازم نضع كلمة "صعب" في كل شيء وطبعًا أوضاعنا ما راح تتحسن إلا إذا تحركنا بدل أن قاعدين نضحك على أنفسنا وفجأة يصدر قرار يدمرنا وخلينا بدل لا نضحك نبكي.

والله يا أخوي ما أدري شأقولك بس هذي ملخص حياتنا والله يستر من إللي جاي (هو شف أنا مو يائس بس إذا ما فعلت شيء أكيد راح يجيني شيء يخليني أتحرك غصب عني)