صفحه الجوازات مقفله ايش الحل

Question

السلام عليكم اخواني انا مواطنه ذهبت الى جوازات مكه يوم الثلاثاء لنقل كفالته زوجي واوراقي كامله بس الصفحة مقفله ومكتوب فيا إيقاف الخدمات من جوزات الرياض واسم زوجي وهويته الغريب انه غير موضحين السبب ولا ايش الحل علما ان زوجي غير مهنته من عامل الى سايق خاص وهو على كفاله اخوه وحصل هذا بدايه السنه واخذ المعقب ٩ آلاف لنفسه غير الرسوم  فهل يكون هذا هو السبب ؟؟وايش الحل الله يعافيكم أبغى انقل الكفاله قبل تنصرف فلوس النقل او يطلع رسوم جديده

Answer 1

لاحول ولاقوة الا بالله ..

اختي ام سالم احتاج منك معرفة مصدر تأشيرة زوجك اللي دخل فيها السعوديه كيف حصل عليها ..!!

عشان اقدر افيدك اكثر ..

في العموم موضوع زوجك 1 من 2
اما تأشيرة دخول وإقامه غير صالحه يعني فيها مشكله او تزوير  
وتم محاسبة اللذين اصدرو التأشيره وفصلهم والغاءها

اما زوجك مطلوب لجهه معينه  يجب مراجعتها وانهاء ايقاف الخدمات


الله يعينكم ويجب مراجعة جوازات الرياض او الترحيل

وان شاء الله يارب يكون مجرد خطأ ..

Comments

اخوي زوجي مولود في السعوديه وعلى كفاله اخوه وقبل كذا كان تابع لوالده الله يرحمه ثم نقل على اخوه بمهنة عامل وبعد فتره حصلت ظروف لأخوه كفيله جربته يلغي سجله وزوجي كان لا يزال على كفالته بمهنة عامل وكنا نعاني جداً كل سنه حتى تتجدد الإقامة والعام الماضي في الحج حصلنا معقب وعمل تعديل مهنه من جوازات جده  وخذ مبلغ ٩ آلاف غير رسوم التعديل والغرامات والتجديد وطول هذه السنه نحسب اننا في السليم حتى ذهبت انا للجوزات من اجل نقل الكفاله بعده بدأنا نسال وعرفنا بان الموظف اللي كان يعمله للمعقب المذكور تم سجنه وهو ما تسبب لكل الذين عمل لهم تعديل مهنه بإيقاف صفحتهم في الجوازات    والآن مانعرف كيف الحل أخاف ادخل لمدير الجوزات يعملون تحقيق وزوجي المظلوم يروح فيها  ايش الحل ربي يفرج همكم

---

الحل   ترفعين  شكوى لاماره  مكة المكرمة  باسمك  واسم  زوجك   بأنكم  غير مسؤالين  عن تصرف المعقب  و موظف الجوازات  وانكم  تعامملتم  معه لانه  معقب  لانهاء المعاملات  ولاتدرون  عن  طرق  تخليص المعاملات    وراح  تنقبل  ميه  في  الميه   يا  ام سالم   بالتوفيق

Answer 2

اختى ام سالم الان اتضح الموضوع مدام سجنو الشخص

يراجع زوجك او اخوه جوازات الرياض وسيتم التحقيق معه بخصوص الحادثه ( تعديل المهنه ) وخليه يقول كل شئ بمنتهى الصراحه ويذكر كل المعلومات اللي عنده مثل ارقام الهاتف الخاصه بالمعقب ومن عرفه عليه ويذكر كل شئ بالتفصيل ويذكر انه كان يريد انهاء معاملته ودفع المبلغ كأتعاب للمعقب وليس ( رشوه ) وان شاء الله سيتم تفهم وضعه
وتشغيل خدماته

مشكلة زوجك الان هي ( ايقاف خدمات ) وممكن تزال خلال دقائق
بعد التأكد من عدم مشاركته في اي عمل او رشوه تخص الموظف المسجون وسيعتبر شاهد عليه ..

ربي يكون بعونك وان شاء الله تبشرينا بإنهاء ( ايقاف الخدمات )

Comments

المشكله ان اللي دلنا عليه قريبي وما نقدر نشتكي خوفا عليه من المسئوليه لعلمنا الاكيد انه يبغى لنا الخير
لكنه مثلنا متضرر وخايف على نفسه
وزوجي خايف ان ذهبت الى مدير الجوزات مثلا او الاماره انهم يحققون معنا وتكبر اكثر
طيب لو نروح لمكتب العمل هل ممكن يرجعون المهنه القديمه ويفتحون الصحفه ونخلص من هذه الورطة
المصيبه انه طول السنه بنتعامل يالهويه في كل شي والامر نظامي حتى في مكتب العمل
ليش الان يعاقبونا على شي مو ذنبنا

---

اختي ام سالم انا ما اقصد اقفلها بوجهك ولكن لا بد ما اكون صادق معك واختصر لك وقت طويل .. ياهارب من قضاي مالك رب سواي ..
اللي موقف خدمات زوجك لجنة التحقيق ومافي غيرهم يقدر يفتحها
ولا راح يفتحوها الا بعد التحقيق مع زوجك ..
ولو ما راجع الان راح يراجع لتجديد الإقامه ولو ماراح بنفسه لتجديد الإقامه راح يتم سحب معاملة التجديد من المعقب يعني اقامته وجوازه وقت التجديد .. بإختصار واسف ان اقول لك كذا بس عشان تركزو في مشكلتكم ولا تروحو هنا وهناك وتضيعوا وقتك والنتيجه وحده
 التحقيق مع زوجك راح يتم برضاه او غصبا عنه عاجلا او اجلا

يتألم قلبي وانا اقول لك كذا ولكن هذا الطريق الوحيد
لابد من المراجعه وانهاء ايقاف الخدمات بعد التحقيق
ادعو الله وخليه يتوكل على الله ويراجعهم او اخوه لو هو خايف
او احد معارفه ..
في الأخير ماراح يسجن معاملة زوجتك تنتهي بأ حد امرين
اما يتفهمو وضعو بإنه زوج مواطنه وتمشي اموره وتشغل خدماته
واما راح يعطى مهله لمغادرة البلاد ..

في ناس اعرفهم نفس حالة زوجك تم تشغيل خدماتهم
وفي ناس نفس حالة زوجك تم اعطائهم مهله مغادرة البلاد خلال شهر وتم تبصيهم بصمة مغادره وعدم دخول المملكه لمدة 5 سنوات

مجرد الإنتظار يتعبكم اكثر اطلبو من الله انها تكون بدون ابعاد وراجعو في ايقاف الخدمات لأنه ماراح ينتهي الموضوع الا بالمراجعه

واذا على وين تعرفتوا على المعقب اكيد ان قريبكم قابله عند الجوازات وسأله عن الموضوع وهو تجاوب معه ..

ربي يعينكم يا ام سالم واذا في شئ ممكن اسويه لكم انا حاضر
بس هذي الحقيقه ولا تفكرو في مكتب عمل او اي جهه ثانيه لأنهم ماراح يسون لكم اي شئ .. ربي يفرج همكم