معاملة صدرت إلى المحكمة

Question

السلام عليكم ورحمة الله وبركاته معاملتي صدرت قبل عشر ايام تقربيا من إمارة مكه إلى محكمة الأحوال الشخصية بجدة  هل في طريقة لمتابعته حاليا؟

Comments

ماشالله تبارك الله مبروك

معناته المعاملات بتمشي رغم انهم مامداومين

---

مثلك معاملتنا تحولت للمحكمة وقبل نراجع علقو الدوامات وماني عارف كيف العمل الحين ..

---

الله يتمم لك على خير
احنا نفس الشي صدرت للمحكمة
ورحنا نحلل في الشميسي يوم الخميس قبل شهر تقريبا
وعلى طول يوم السبت اللي بعده وقفوا دوام المختبر
والحين معلقين محنا عارفين التحاليل ضابطة ولا لازم نحلل مرة ثانية لانهم اجزوا على طول يمكن ما اشتغلوا عليها حتى

الله يعين

Answer 1

مرحبا اخوي
الف مبروك ان شاء الله
كيف تستعلم عنها وهي خلصت ؟
على ما اعتقد والله اعلم ما تستعلام عنها لانها انتهت وراحت للمحكمه ان شاء الله بعد الازمه دي تروح وتعقد
ان شاء الله تلاقي الي يساعدك هنا !!

بس حبيت اسئلك اخوي معاملتك قدمتها يدوي ولا الكتروني ؟
وهل بيداوموا الموظفين لان معاملتي في الشؤون الامنيه وابي اعرف
هل بيداوموا ولا لاء ؟

Comments

انا معاملتي تحولت من الإمارة مع الأزمة أكيد مداومين الشوؤن الأمنية مدري عنه والله

Answer 2

بالفعل المعاملات الي تحولت للمحكمه كيف تتابع , ومين يقدر يفيدنا بهذا الموضوع , بعدين بما انه اكيد المحاكم مقفله ومانعرف الين متى  بس المعاملات ماشيه الكترونيا , هل يقدر الواحد يعقد بالبيت يعني يشوف ماذون من الي يصدرو عقود الزواج الالكترونيه .

Answer 3

اليوم تواصلت مع وزارة العدل وسالتهم وكان ردهم انه المحاكم مغلقه, قلتلهم يعني الحين مانعرف لمتى ممكن يستمر التعليق والحجر مافي اي حل لعقود الزواج. طلب مني ارفع الموضوع مع بياناتي وهما راح يشوفو الوضع وراح تجيني الرد برساله , وان شاء الله خير

Comments

خبرنا ايش يصير معك

---

فين رفعت البيانات وكيف الإجراء

---

دخلت على موقع وزارة العدل ورسلت استفسار وردو عليا انه المحاكم مغلقة , بس رجعت شرحت الوضع اكثر راح طلب مني رقم الهوية وتلفوني واسمي رباعي والمشكلة وقال لي انهم راح يردو برساله , ياريت الكل يبدا يعمل كذا . اقله يشوفو انه في ناس حالها واقف ومتعطله امورها وقلت له مانعرف لمتى راح يكون التعليق لازم يكون في حل .

---

هذه تصريفت وزارة العدل هوه يسوي استفسار و يرسلها  لوزارة العدل وتجيك رساله تم استلام طلبك كانك في الاتصالات ولا راح يجيك رد

Answer 4

رجعت تواصلت مع وزارة العدل وردهم كالاتي انه نخلص الاجراءات تبع تعبئة البيانات تبع الزوج والزوجه والشهود وترسلها , ولما تفتح المحاكم نعقد , وللاسف مافي اي تعميم وصلهم بخصوص عقود الزواج بين شخص سعودي وغير سعودي .

Comments

معليش بس كثر عليك بالاسئله

معاملتك راحت وزارة العدل ولا بس الداخليه و هم ردوها للاماره و الاماره ترسلها للمحكمه

لان معاملتي من الداخليه دايركت على وزارة العدل بالرياض مو المحكمه و الحين رجعوها للداخليه جلست عند وزارة العدل 58 يوم

---

الله يعطيك العافية

---

لا المعامله من الداخليه للامارة والحين صدرت للمحكمه وراح اعمل زي ماقالو لي ادخل اعبي بياناتي وبيانات الطرف الثاني والشهود وارفعها على موقع وزارة العدل وان شاء الله لما تفتح المحاكم نعقد , يمكن معاملتي تختلف عن المعامله تبعك انا زواج سعودية من مقيم . مو تصحيح زواج

---

الف مبرووك
بس استفسار كم جلست معاملتك في الامارة بعد مارجعت من الداخلية ؟؟ وفي اي امارة مقدم؟

---

فيه أحد منكم عقد أو راجع المحكمة ؟

---

الحين وبعد مارجعت الدوائر الحكوميه للعمل , لازم تاخذ موعد للمحكمه , تدخل على موقع وزارة العدل تختار المحاكم بعدبن طلبات الانهاءات وتدخل الخدمات وتختار عقد زواج وتعبي البيانات , زي اسمك واسمها واسماء الشهود والتقرير الطبي ورقم الموافقه, وبعدين يجيك رقم طلب , بس المشكله الي صادفتني انه تحاليل الزواج خلصت سته شهور بسبب كرونا وتعليق الدوائر الحكوميه وللاسف الطلب معلق الين نعيد التحاليل و بس المصيبه انه ماتقدر تروح تعمل التحاليل بدون ورقة رسميه من المحكمه . والمحمكه ماتستقبل الا مواعيد , تواصلت مع رقم التواصل 1950 وقالو بعد يوم الاحد الجاي اقدر ادخل الموقع تبع وزارة العدل واخذ موعد اروح المحكمه اشوف موضوع التحاليل . والله العظيم مو بيدنا انه التحاليل عدى عليها اكثر من سته اشهر لازم يتفهمو الوضع
الله المستعان بس .

---

إن شاء الله القضاة يتفهمو موضوع التحاليل ..  بس ابغى اسألك كيف أعرف رقم الموافقة

---

بعد ماتتقفل المعامله بالداخليه تتصلي وتاخذي الرقم تبع الصادر للاماره وطبعا من موقع الاماره الخدمات الالكترونيه تعملي استفسار عن معامله تحطي رقم الصادر وتتابعي الين تلاقيها طلعت المحكمه بس تطلع المحكمه . تدخل موقع وزارة العدل وتعبو بيانات تيع العريس والعروسه والشهود وولي الامر. والحين احنا بجده حظر اسبوعين كمان الله المستعان وقف حالنا على الاخر .

---

رقم الموافقة هو رقم الصادر من إمارة مكة لمحكمة الأحوا ل الشخصية ؟؟

---

انا حطيت رقم الصادر للمحكمه مافي غيره , بالنهايه راح يتاكدو من بيانات العريس والعروسه وكمان واهم حاجه رقم التقرير الطبي , لانه للاسف كل مانرفع نبغى ناخذ موعد يرجع انه الطلب غير مكتمل بسبب التقرير الطبي .

---

صار معاكم شيء يا جماعة ؟؟

Answer 5

ألف مبروك أخوي الله يسهل أمرك

ممكن تفيدني

١- متى وصلت معاملتك للداخلية؟ لأن معاملتي من شهر ٥ وللحين عندهم بسكرتارية الزواج ولا ادري متى بتخلص .. وكم جلست معاملتك بالضبط؟

انا زواج اجنبي مقيم من المواليد من مواطنة