السلام عليكم جميعا
حابة أشارك تجربتي بالزواج من غير مقيم عشان الكل يستفيد ان شاء الله والله يسهل أمورنا جميعا
الاجراءات العادية :
1- أول شي رحت الشرطة طلبوا مني الطلبات اللي هيا (صورة من جواز سفر الزوج، صورة هويتي، و صورة جواز سفري، و اثبات عمل للخطيب،و برنت من الاحوال انه انا مو طالبة و ما اشتغل)
2- قدمنا الاوراق كلها للشرطة و اتحولت على المحافظة و تقعد في المحافظة من يومين لأسبوع و تتحول لامارة مكة
3- تقعد في امارة مكة أسبوع و تتحول للداخلية
4- في الداخلية اتحولت لسكرتارية لجنة الزواج و تقعد هناك من شهر- 3 شهور حسب الاجراءات و بعدين للخارجية اذا كانت موافقة
5- الخاجية بترسلها للسفارة للبلد اللي مقيم فيها الخطيب وانا خطيبي اردني في الاردن فاتحولت لهناك و أنا حاليا بنتظر توصل السفارة لاكمال اجراء العقد ان شاء الله
(بشارك معكم المشاكل اللي أخرت صدور معاملتي لمدة سنة و 6 شهور عشان ما يصير معاكم نفس الشي)
1- اول مرة راحت المعاملة بكل الاجراءات ووصلت الداخلية قعدت شهر و رجعوها ثاني (طبعا ترجع للامارة و من الامارة على المحافظة و من المحافظة على الشرطة عشان نعرف ايش اللي ناقص ودي المدة لحالها 3 أسابيع) وطلعت الورقة الناقصة ورقة خلو السوابق مصدقة من السفارة السعودية في الاردن و هادي الورقة ما طلبوها الشرطة من البداية فطلبناها من الاردن ولازم ترسلوا الورقة لواحد من مكاتب التصديق المعتمدة من السفارة عشان تصدق غير كدة السفارة ما حتصدق عليها الا بحضور المخطوبة وولي امرها.
2- بعد ما جبنا الورقة و صدقناها طبعا راحت بنفس التسلسل شرطة و محافظة و امارة و داخلية قعدت شهر و رجعت مرة ثانية انه ناقصة كان يحتاجوا ورقة لازم اوقع عليها تفيد انه اولادي ما حياخدوا الجنسية وهذا الكلام و مكان العقد يكون في الاردن. وقعت الورقة ورجعت للداخلية.
3- قعدت شهر وو رجعت مرة ثانية و دي المرة كانوا يحتاجوا اثبات انه الخاطب ما اتزوج قبل كدة مصدق من السفارة طبعا كلمت السفارة و قالوا ما يصدقوا دي الاشياء فكتب خطيبي مشهد باسمه و توقيعه ووقع عليه مع اثنين شهود ورجعت مرة ثانية للداخلية قعدت شهرين بالظبط و صدرت عالخارجية بالموافقة ولله الحمد
ملاحظة: أنا اعرف كثير اوراقهم رجعت بسبب عدم وجود ورقة خلو السوابق فأتأكدوا انه ترفقوها مصدقة من السفارة مع الطلبات من البداية حتى لو الشرطة ما طلبوها غير كدة الطلبات الثانية ما اعرف احد ثاني انطلبت منه فالموضوع يعتمد كل طلب لحاله لكن الطلبات الاساسية هيا اللي ذكرتها فوق
الله يا رب ييسر على الجميع الموضوع يبغاله طول بال و صبر و دعاء و ربي ييسر امرنا جميعا يارب
