١- اول شي تقدمين طلب إلكتروني من موقع المحافظة.
٢- تتحول بعد يومين للشرطة وتروحين هناك قسم النساء ويعطونك طلبات تجيبينها وهي: خطاب تحليل تروحين تسوينه وتطلع النتيجة بعد اسبوع + تعريف راتب اذا موظفة مختمه من الغرفة التجارية/ او مشهد من عمدة الحي اذا غير موظفة. + شهادة اسلام. + هويتك الأصل. تقريبا هذي الأشياء اللي أخذوها مني
٣- بعد ماتجهزين كل الأوراق وتحطينها في ملف علاقي تروحين لقسم الشرطة لنفس الحرمه تقدمين الأوراق وتخليك توقعين على كم ورقة. وتسالك اذا تبغون عقد النكاح في المحكمة (في مدينتك) او السفارة السعودية في امريكا. وتعطيك موعد (غالبا يكون بعد شهر ونص او شهرين)
٤- بعدها تتحول للمحافظة وتقدرين تشيكين على سير المعاملة من الرقم الجديد اللي يعطونك هوا الشرطة.
٥- اذا وصلت لمكتب الزواج بإجراء مراجعه تخلين احد يروح المحافظة ياخذلك موعد (غالبا يعطونك موعد بعد اسبوع) يوم الموعد يروح ولي امرك مع اثنين شهود سعوديين. وياخذ معاه هويتك وصوره من جواز خطيبك مترجمه ترجمه معتمده وكمان شهادة الاسلام مره ثانيه. ياخذون من ابوك بعض المعلومات عن خطيبك. (عنوان سكنه ووظيفته وراتبه). وبس
٦- تمر معاملتك على بعض الأقسام بس ماتطول وتتحول بعدها للإمارة.
٧. بعد اسبوع ترسلين احد للامارة ياخذ رقم قيد جديد عشان تتابعين معاملتك من موقعهم. حتمر على بعض الأقسام (غالبا المدة ١٠ ايام على كلام بعض المجربين)<< انا اليوم وصلت معاملتي الاماره فالخطوات اللي بعد كذا هي بناء على اللي قرأته من تجارب الاخوان والاخوات.
٨- تتحول بعد الإمارة للداخلية وبرضو ترسلين احد (او حاولي تتصلين) تأخذين رقم جديد تتابعين سير معاملتك في الداخلية. (غالبا تاخذ من شهر الى شهر نص)
٩- بعدها تتحول للخارجية
٨. اتوقع في هذي المرحلة اذا تمت الموافقة باذن الله يحولونها للمحكمة او السفارة السعودية حسب اختيارك لمكان عقد النكاح.
بصراحه مالقيت معلومات كثيرة في حال كان الخاطب غير مولود وغير مقيم في السعودية بس ان شاءالله بكتبها اذا انتهت معاملتي على خير باذن الله تعالى.
الله يوفقك ويوفقنا جميعا ويسهل امورنا.
