عندي اذن دخول الى دبي لكن المشكلة سفري من غير الوالدة ؟!

Question

السلام عليكم

بعد النظام الجديد لأستخراج تاشيرة دخول مرافق الى الامارات وتجارب الاخوان هنا بالسفر وبعضهم دخلو من غير مشاكل وبعضهم رجعوهم توكلت وقررت عمل الاجرائات والتجربة بنفسي وحمدلله بعد رفع الاوراق الى موقع جوازات الامارات بعدها بيومين طلبو ايضا رفع النواقص الي هيا كانت هوية الوالدة بعدها تقريبا بـ اربع ايام جاتني الموافقة ( اذن دخول مرافق الكتروني ) pdf المهم حجزت رحلة على خطوط فلاي ناس يوم 21 ابريل ان شاء الله ربي يسهلها وعزمت على الذهاب وحتى ان رجعوني لكن التجربة خير برهان

المهم اليوم ذهبت الى قنصلية الامارات بجدة ومعايا الأذن للأستفسار بذهابي من غير الكفيل الي هيا الوالدة واخبروني انه ماينفع وحيرجعوك مدام حتسافر من غير الوالدة وايضا كنت غير مقتنع وطلبت منهم رقم جوازات مطار دبي واعطوني واتصلت عليهم وقالولي نفس الاجابة وايضا اتصلت على خدمة امر تبع شؤون الاجانب وايضا نفس الاجابة ومابرد قلبي ورحت على طيران الامارات وقلتلهم بالسالفة قالولي مدام معاك الاذن واوراقك تمام ان شاءالله تعدي لكن على مسؤليتك الخاصة

الان انا طالب انتظام بجامعة الملك عبدالعزيز وغير موظف وباذن الله بطلع على دبي خير شر دخلت نحمدالله ونشكره واذا رجعنا خيرة ونصبر على الضيم لكن ابغى اعرف ايش الاوراق الي احتاجها لمن اوصل مطار دبي وهل احد عنده افادة او توجيه يوجهني ويعطيكم الف عافية وبأذن الله بكتب تجربتي بعد السفر وسامحوني على الأطالة

Answer 1

السلام عليكم

حمدلله دخلت دبي بكل سهولة ومن غير اي تعقيد لكن السبب إنه اخبروني انو ماحقدر اطلع طيارة جدة على دبي الا اذا كانت الوالدة معايا ورضخت للموضوع وقلت اطلع  الوالدة وامشيها واخذتلها تذكرة قبل السفرة بيومين وشلتها معايا والامور بمطار دبي جدا سهلة وفي دقيقتين موظفة الجوازات ختمت على الجواز ودخلنا دبي برجلنا اليمين وهذه تجربتي وان شاءالله المرة الجاية حجرب اطلع تاشيرة مقيم واشوف ايش يسير معايا

شكرا للي اتفاعل معايا وجزاكم خير

Answer 2

وعليكم السلام ,,,

انا قبل شهرين رحت دبي بس الفرق اني طلعت تأشيرة مقيم وليست مرافق وانا ابن مواطنة لكن حق المكتب قلي حطلعلك تأشيرة مقيم وبالفعل بعد ماصدرت اخذتها ورحت وانا خايف بس عدت عاادي جدا وحتى هناك طلبو مني الاقامة في الكاونتر حق جوازات دبي وماقالي شي مع انو شاف المهنة ابن مواطنة بس قالي طالما معاك التأشيرة محد يقلك شي
وسافرت على الخطوط السعودية وطلبو مني التأشيرة عشان يتأكدوا وقلي لو مامعاك التأشيرة ماكنا حنطلعك الطيارة

وفي الاخير الله يسهلك ان شاء الله وتروح ...

Comments

ممكن تقولي عنوان المكتب اللي طلعلك التأشيرة
و كم اخذ منك و فيه اي مدينة

---

والله اول مرة احد ينبهني على هذه الشي طيب اخوي تاشيرة مقيم مايحتاج تكون موظف او يطلبو منك تعريف من الشركة او ايش الطريقة والله يعطيك العافية ع الاجابة

---

اتواصلت مع جوازات دبي لكن يوم اقلهم جنسيتي يمني يقفلوها بوجهي اول شخص قالي لو غيرت التاشيرة من مرافق الى مقيم للجنسية اليمنية لازم ترفق تذكرة الزوجة وتكون معاك الزوجة قلتله واذا مو متزوج قالي ماتقدر تدخل اجرائات امنية !!

ثاني شخص قالي لو غيرت الى تاشيرة مقيم لازم تلغي الاولى وتقدم على الثانية ولكن لمن تجي على دبي الكفيل لازم يكون معاك !! يعني مني عارف اجيهم يسار يجوني يمين والحل يعني !!!!!

Answer 3

ولد خالتي طلع تأشيرة إبن مواطنة وراح المطار بس للأسف رجعوه  قالول له لازم الوالدة تكون معك
ولو معك التأشيره العادية كان دخلت .
(لو تطلع التأشيره العادية أحسنلك ليش تغامر )

Comments

والله معلومة جديدة عليا لكن الان بحاول مع الجوازات انو اغيرها لتأشيرة مقيم والله يسهل ويعطيكم العافية

---

والله ما اذكر اسم المكتب لكن هوا في جدة بالصدفة طبيت عندهم

- بالنسبة لتأشيرة المقيم انا طلعلي هي ومكتوب فيها المهنة مندوب مبيعات وانا في الاصل محلل نظم معلومات وقالي مايأثر الموضوع واساسا عندي ف الجواز غير مذكور اني موظف او طالب والامور مشت عاادي ولا جبت معايا خطاب من الشركة ولا شي

- النقطة الثانية لازم تتأكد من موضوع الجنسية اللي اعرفه انه الجنسية اليمينة والسورية والفلسطينية ممنوعة من الدخول لدبي حتى وان كان الكفيل معك فأتمنى انك تتأكد من الموضوع قبل لاتخسر

والله يسهلك الموضوع...