السلام عليكم ورحمة الله وبركاته,,,
اكتب لكم تجربتي في الزواج حتى أتت الموافقة ولله الحمد
في البداية انا من مواليد المدينة ومن سكانها والمخطوبة من سكان جدة
- قدمت المعاملة في أمارة المدينة وكانت عبارة عن معروض لأمير المنطقة مرفق صورة هويتي وهوية المخطوبة واقرار خطي من ولي امرها مصدق من عمدة حييهم بجدة واقرار من والدتي كذلك مصدق من عمدة حيينا ** بس انا استغربت انهم يبغو اقرار من والدتي المهم اني جبت الاقرار ** وبنفس اللحظة جاتني رسالة برقم المعاملة في الامارة وقالولي بتجيك رسالة خلال يومين انها اتحولت للمديرية العامة للشرطة
- جاتني الرسالة انها اتحولت المعاملة للمديرية العامة للشرطة واعطيتها يومين وراجعتهم وقالولي وصلت المعاملة وحولناها لشرطة الحي اللي انا فيه واخذت رقم الصادر ويومين كمان وراجعت شرطة الحي
** المراجعة ثم المراجعة ثم المراجعة ** لو ماراجعت ترى اوراقك بتكون في الدرج محد يطالع فيها
ورحت شرطة الحي وطلعلي المعاملة وقالي انزل تحت مكتب الاجراء والتكاليف الخاص بأمور الزواج * هنا يبدأ الشغل*
وطبيت في واحد متعاون ولله الحمد
المهم بدأ يعطيني الاوراق المطلوبة وهي عبارة عن خمس خطابات لـ
1- الاحوال المدنية ** وهذي هما يرسلوها للاحوال عشان تصديق شهادة الميلاد اللي عليك تاخذ رقم الصدار عشان تراجع الاحوال وتتاكد انهم انتهو منها ورجعوها للشرطة وتاخذ الرقم الصادر للشرطة**
2- الجوازات ** نفس حكاية الاحوال هما يرسلوها اللي عليك تراجعهم وبتاخذ وقت معاك الجوازات والخطاب عشان يتأكدو انو ماتم استبعادك من البلد قبل كذا ولازم تتأكد بنفسك انهم خلصو اوراقك وارسلوها للشرطة وتاخذ رقم الصادر معاك للشرطة لو مارجعتم ترى محد بيسوي شغلك **
3- خطاب لادارة السجن العام ** نفس حكاية الاحوال والجوازات بس يا اخوان لازم تراجعوهم عشان يخلصوها كل يوم انقز لهم اذا تبغى اوراقك تخلص وهذا الخطاب عشان يتأكدو ماعمرو نزل عليكم حكم سجن بس انا اخذت النتيجة منهم يدوي بصفة ودية او كان هما ارسلوها للشرطة ماتفرق كثير **
4-خطاب اللأدلة الجنائية ** وهذي يعطونك هيا بيدك تروح تبصم وتاخذ النتيجة خلال عشرة ايام وذا بتعرف احد في نفس اليوم يعطوك هيا **
5- حطاب للمستشفى ** وهذي يعطوك هيا بيدك عشان تحاليل الزواج
وتروح للمستشفى تسوي التحليل وتطلع النتيجة برضوا خلال 10 ايام وقيمة التحليل اظن 750 ريال بس وقتها قلتلو انا ابن مواطنة مشاها بدون فلوس **
نجي للنقطة اللي حطمتني شوية
قلتلو طيب خطاب للمخطوبة عشان تسوي التحاليل؟؟ قالي لااا هي من جدة لازم تعملو في جدة بعد ماتخلص اوراقك كلها نرسل المعاملة الى جدة وهي تراجع الشرطة ويدوها خطاب وبعد ماتخلص ترجع المعاملة للمدينة وكذا!!!
انا مادخلت مزاجي هرجة المعاملة تروح جدة وترجعلي المدينة وفي نفس الوقت هوا بيقلي اصلا المفروض المخطوبة تقدم معاملة الزواج لامارة جدة.. كيف امارة المدينة قبلت المعاملة منك قلتلو اهو شوفة عينك الحمدلله
المهم من هنا وهنا وافق يعطيني خطاب لها عشان تسوي التحليل معايا لاني خفت من سفر المعاملة لجدة ورجعتها حتطول الشغلة ويمكن تضيع والبنت ايش عرفها اي شرطة تراجع
المهم قالي طيب بس تجبلي اثباتات انها ساكنة في المدينة يعني تجبلي عقد ايجار باسم ولي امرها وخطاب من العمدة
قلتلو بسيطة من اقرب مكتب سويت عقد الايجار ب 100 ريال وخلصت الموضوع واثبت انها من سكان المدينة وخليت ولي امرها يجي المدينة يوقع ورقة انو من سكان الحي من عمدة الحي وخلصنا
واخذت خطاب للمستشفى باسمها وعملت التحاليل
واخذت لها خطاب من الشرطة للاحوال يطلبو منها برنت كامل
وسلمت كل الاوراق للشرطة بعدين طلبو من افادة تعريف بأنها طالبة وهذي بسيطة برضو
- بعد ذا كلو قالولي لازم المخطوبة وولي امرها يجو في استمارة يعبوها ويوقعوا عليها وهذي اخر خطوة وهذي الخطوة زمان كانت عن طريق الامارة ودحين صارت عن طريق الشرطة
- طلبو مني افادة اني موظف شامل الراتب عشان الاستمارة الخاصة بي مطلوب فيها دي البيانات
- بعين افتكر انو البنت تقربلي قالي انصحك تطلع صك اثبات قرابة من المحكمة عشان تسهلك الموافقة والمعاملة قلتلو طيب اعطاني خطاب موجه للمحكمة باصدار صك اثبات قرابة والحمد لله في نفس اليوم طلعتو وماكان يلزم حضور البنت فقط صورة هويتها وهويتي واثنين شهود واثنين مزكيين
** طبعا صك اثبات قرابة يسقط شرط العمر للخاطب والمخطوبة وهذي الفايدة الكبرى منه وفي المعروض اللي قدمته ذكرت انها تقربلي من الدرجة الاولى عشان يمشي سير المعاملة الين اطلع الصك **
وسلمتهم الاوراق كاملة
قالولي خلاص نسوي خطاب ونرسل المعاملة للأمارة ومن الأمارة للمحكمة
وبعد ماوصلت المعاملة للامارة اتفاجئت انهم حولو المعاملة لوزارة الداخلية بالرياض قلتلهم ليش انا من مواليد المملكة قالولي ماندري احتمال عشان جنسيتك غير عربية وهذا الارجح
- بدأت اراجع وزارةالداخلية عن طريق الهاتف المجاني عشان اعطيهم رقم الصادر من الامارة ويعطوني الرقم داخلي عندهم ويسير اراجع عن طريق الموقع
الى ان تم اغلاق المعاملة وارسالها للامارة مرة ثانية وراجعت الامارة وقالي الموظف خلاص لازم نرسلها للشرطة عشان تشوف الموافقة وترجعلنا ثاني ونحولها المحكمة
طبعا انا ماصدقت الكلام ورحت لكم واحد ثاني وقالي غلط الكلام تتحول من عندنا على طول للمحكمة قلت الحمدلله
** الغرض انو ترى في ناس كثير تفتي وماتعرف شغلها بالتمام** لازم تتأكد من المعلومة بنفسك وتسال الناس عنها
وكلمت واحد اعرفو بس عشان يحولها في نفس اليوم اللي جات للامارة يحولها للمحكمة ولا هي تاخذلها اسبوع ممكن الين تتحول
واعطاني رقم الصادر وراجعت فيه المحكمة بعد ثلاثة ايام لقيتها وصلت
قالولي خلاص جيب المخطوبة وولي امرها واثنين شهود وعبي البيانات عن طريق النت وتعال اعقد
مايحتاج مواعيد ولا شي تجي الصباح بدري تخلص امورك طبعا اتكلم عن المدينة المنورة ولاااااازم الكشف الطبي يكون معاك لانو الشرطة حتاخذ صورة والاصل يبقى معاك وفي حال عدى على الكشف الطبي 6 شهور يلغى وتسوي كشف طبي جديد
وبس والله اخترت اليوم اللي ابغاه وجيت الصباح بدري وخلصت اموري ولله الحمد
طبعا اغلبكم حيسأل المدة كم اللي اخذت في المعاملة انا حقلكم
قدمت المعاملة للأمارة يوم 14/7/1436
اسبوع وراحت لشرطة الحي جلست في معمعة الشرطة والاوراق عشان اخلصها الى يوم 29/8/1436 هذا بعد المراجعة اليومية لجميع الادارات واخلص الخطابات اللي ارسلوها واللي اعطوني هيا الخمسة اللي كتبتها فوق
راحت من الشرطة للامارة يوم 11/9/1436
اتصدرت من الامارة للداخلية يوم 23/9/1436
رجعت من الداخلية للامارة يوم 5/11/1436
الين توصل الامارة اخذتلها 10 ايام واتحولت المعاملة للمحكمة ووصلت المحكمة بتاريخ 19/11/1436
وعقدت يوم 26/11/1436 ولله الحمد
اعتذر عن الاطالة بس حبيت افيدكم بتجربتي زي ما استفدت من تجارب الاخوان هنا
طبعا تجربتي في المدينة المنورة لاني بأشوف بعض الامور بتفرق من مدينة لمدينة
اخر شي يا اخوان المراجعة ثم المراجعة ثم المراجعة روح الجهة المطلوبة وخلص امورك بنفسك لو ماسويتها محد بيسويلك شي
والله ولي التوفيق,,,
