تجربتي بالتفصيل في معامله زواج من اجنبي مقيم غير مولود بالسعوديه في منطقه جده. عن تجربتي الشخصه ويلي حدث معايا.
عمر الخاطب ٢٧ سنه موظف قطاع خاص.
عمر المخطوبه ٢٥ سنه موظفه قطاع خاص.
اول خطوه:
كتابه خطاب موجهه الى سمو امير المنطقه توضح وبيانات المخطوبه وبيانات الخاطب، يعني خطاب بسيط يشرح الموضوع
وفي النهايه اسمك وهويتك ورقم جوالك الدائم
ينحط الخطاب مع صوره من بطاقه الاحوال للمخطوبه فقط في ملف علاقي اخضر تقدميه الى اماره جده انا قدمت في قسم النساء.
بعدين ارسلولي انه تم تسجيل طلبك في اماره جده برقم *** بعدها بيومين اترسلت رساله انه تم تحويل طلبك الى شرطه جده برقم *** بعدها تراجع الشرطه في حي النسيم بعد ٥ ايام من تاريخ الرساله لانه عشان تتحول الاوراق لهم، دخلت الشرطه قسم النساء مكتب الزواج اخدت الرقم يلي تحولت بيه، ادتني الاوراق يلي نجيبها واتاكدت من عمري فوق ٢٥ سنه.
الاوراق كانت بالنسبه للخاطب:
- صوره من الاقامه مع احضار الاصل للمطابقه
- صوره من جواز السفر مع احضار الاصل والترجمه اذا كان الجواز غير عربي مصدق من مكتب معتمد للترجمه.
- خطاب تعريف للراتب مصدق من الغرفه التجاريه ( يفضل يكون الراتب فوق ٤٠٠٠ ريال سعودي)
- تحليل ماقبل الزواج
- بصمات من الجنائيات
- خطاب مختوم من العمده انه ماسبق له الزواج من سعوديه.
الاوراق بالنسبه للمخطوبه:
- صوره من الهويه الوطنيه واحضار الاصل للمطابقه
- برنت من الاحوال
- خطاب تعريف بالراتب
دي الاوراق يلي انطلبت مننا ويفضل قبل ماتسلموها تتاكدوا انها مرتبه وكامله.
سلمنها في مكتب الزواج وادتنا موعد بعد شهرين للمراجعه والمراجعه حتكون برقم هويه المخطوبه.
بعد شهرين راجعنا الحمدلله اتحولت الى اماره جده برقم، راجعنا اماره جده وحددوا لنا موعد لتعبئه النموذج واحضار الخاطب وولي امرها او المخطوبه وشاهدين يكونوا يعرفوها دي النقطه مهمه لانهم يسالوا الشهود اسئله. بعدها بيومين حولها الى اماره منطقه مكه المكرمه برقم وفي اماره منطقه مكه تجلس اسبوع ووتحول الى الداخليه لانه غير مولود بالسعوديه برقم والداخليه تراجعي عن طريق التليفون وتجلس تقريبا من شهر الى شهر ونص حسب تجربتي
ولازم تتصل اسبوعيا عشان تعرف اذا خلصت او لا،، اذا خلصت يدوك رقم انها رجعت الى اماره منطقه مكه المكرمه
تراجع اماره منطقه مكه بعد ٥ ايام بالزبط يدوك رقم القيد وتجلس تقريبا يوم واحد ويحولها الى محكمه الاحوال الشخصيه في جده برقم وتروح المحكمه تحدد موعد لعقد النكاح.
ملاحظه برقم القيد يلي يعطوكم هوا ممكن تشوفوا في النت.
والمده يلي استغرقت المعامله حقتنا ٦ شهور والحمدلله تمت ع خير. بدون اي واسطه
وان شاءالله يكون استفدتوا ويكتبلكم الخير يارب.
