ابني الغير سعودي والاقامه خارج المملكه

Question

انا مواطنه سعودية متزوجه من اجنبي على كفالتي وعندي منه طفل عمرة سنه ونص
ظروف العمل في المملكة  لم تناسب زوجي وقرر انه يقبل بوظيفه في الخارج  وماتوقع انه عنده نية للرجوع للسعودية مره ثانية  طبعا انا مضطره للعيش  معه انا وابني مشكلتي انه لما اقرر ازور اهلي في السعودية كيف ادخل ابني للبلد؟

Answer 1

اذا زوجك طلع من السعوديه بتأشيرة خروج نهائي تقدري تخلي ابنك على كفالتك وتطلعي له اقامة ابن مواطنه ..

عن طريق معاملة استقدام وطلب تأشيرة ابن مواطنه تمنح لأبنك

والأفضل تخلي ابوه كمان يكون معاه اقامه على كفالتك زوج مواطنه
ومايمنع انه يجي السعوديه كل ستة اشهر لو ساعه او يوم وبعدها يغادر عشان يحافظ على الاقامه ..

القرار في الأول والأخير لك وهذي اجابه بشكل عام ..

ولو حابه تفاصيل اكثر افيديني
هل زوجك غادر بخروج نهائي او عنده اقامه ساريه في السعوديه ؟
وعمر ابنك كم ؟
وهل زوجك موافق يجي السعوديه كل ستة اشهر لو يوم
ويغادر عشان يحافظ على الإقامه او لا ؟؟

Comments

انا تكلمت من قبل  مع زوجي في هالنقطه وماعنده مانع من انه الاقامة تكون سارية في السعوديه بس فكره السفر للسعوديه كل 6 اشهر صعبة
فكنت افكر لو صارت ظروف وماجاء للسعوديه خلال هالفترة كيف تكون معاملة ابني هل راح تكون عن طريق وزارة الداخليه او بالاصح السفارة السعوديه في البلد...الموضوع جدا معقد وياليت وزارة الداخليه تشوف حل لنقطه ال6شهور....الحمدالله على كل حال.
اجابتي على الاسئلة
زوجي ماراح يغادر بخروج نهائي وفي نفس الوقت مو ضامن القدوم للسعودية كل 6 اشهر
عمر ابني سنه ونص

جزاك الله كل خير أخوي

Answer 2

(( زوجي ماراح يغادر بخروج نهائي وفي نفس الوقت مو ضامن القدوم للسعودية كل 6 اشهر ))

اخت احلام لازم تجلسي مع زوجك وتقرروا في الجمله السابقه ولازم يكون موقفه واضح عشان مستقبل ابنه .. وابسط لك المسأله بالشكل التالي :

الحاله الأولى نقل كفالة الطفل عليك ..
 اذا زوجك طلع بخروج نهائي يكون افضل لنقل كفالة ابنك عليك لأن من شروط نقل كفالة الطفل على امه السعوديه ان يكون زوجها غادر بخروج نهائي او الطلاق لا سمح الله
اذا زوجك اقامته ساريه المفعول داخل السعوديه وانتي على ذمته ما يسمح لطفلك ينقل كفالة عليك الا لما يوصل سن 18 سنه ..

وغير كذا يبقى على كفالة والده وعلى اقامة والده ومرتبط فيها ..

وهنا لازم والده ينتبه لأقامته ولازم يجي السعوديه كل ستة شهور عشان ما تسقط الإقامه ويدخل ابنك في متاهات ..

الحاله الثانيه وهي الأفضل من وجه نظري
انك تكفلي والده بمهنة زوج مواطنه وبالتالي تكوني كفيلة الأب والأبن
ويكون عندكم ابشر واموركم تمشي من بيتكم عن طريق النت ..

وبرضو لازم والده ينتبه لأقامته ولازم يجي السعوديه كل ستة شهور عشان ما تسقط الإقامه ويدخل ابنك في متاهات ..


الحاله الثالثه

تحاولى تنقلو كفالة الطفل عليك ابن مواطنه بأي طريقه بوجود الأب وهذا الموضوع يحتاج لمعرفه او استثناء من مدير جوازات المنطقة
وبكذا يكون ابنك مرتبط معك انتي وبس والأب بعدها براحته وقتها اذا حب يرجع او اذا حب ما يرجع ويسقط اقامته يكون القرار خاص فيه لوحده..


اخيرا من باب الذكر رغم صعوبتها في تأشيرة خروج وعوده مدتها سنة
تريحكم من الستة شهور ولكن تحتاج لسبب مقبول في الجوازات او استثناء من مدير جوازات المنطقه ..

كمان  انبهك لنقطة انه يسافر وما يرجع بتكون زيها زي الخروج النهائي تؤدي لسقوط حق الإقامه له ولأبنه ووقتها بتحتاجي استقدام جديد لأبنك ..


واي استفسار ثاني لا تترددي وقبلها طبعا لازم جلسه صارمه وحازمه مع ابو العيال تحددو فيها خياراتكم وربي يوفقكم للخير ان شاء الله ..