السلام عليكم ورحمة الله وبركاته
اولاً الحمدلله الذي بنعمته تتم الصالحات تم عقد قرآني وتزوجت ،،
لأني حست وتهت عشان القى معلومة لمعاملة شبيهة لمعاملتي في هذا الموقع ولم اجد , حبيت اطرح تجربتي لعل وعسى تفيد احد في يوم من الايام.
نوع المعاملة : زواج سعودي من اجنبية مقيمة ليست مواليد
جنسيتها : يمنية
طبعاً التقديم كان في موقع محافظة جدة , بعد يومين بالضبط من التقديم جاتني رسالة ان المعاملة صدرت لشرطة محافظة جدة برقم.
طبعاً بعد ما جاتني هذي الرسالة اتوجهت لشرطة محافظة جدة (مكتب الزواج) موقعهم بحي النسيم بجدة بالرقم اللي في الموقع.
لما رحت باول زيارة لهم طلبوا مني احجز موعد عشان اجي باوراق اولية هم يطلبوها وبنفس الوقت يعطوني لستة الاوراق اللي لازم اجيبها عشان تنحط بملف وتترسل للمحافظة وهذي كانت الاوراق الاولية:
من الخاطب:
1- صورة من الهوية + الاصل.
2- صورة صك الطلاق اذا كان مطلق.
3- تقرير طبي للزوجة اذا كان متزوج.
4- شهادة وفاة الزوجة اذا كان ارمل.
من المخطوبة:
1- صوة من الاقامة.
2- برنت من ابشر بتاريخ انتهاء الاقامة لابد تكون مجددة.
3- صورة من جواز السفر.
صورة من شهادة الميلاد اذا كانت مولودة بالسعودية.
طبعاً ما حجزت موعد لان الموعد بعيد , رحت ثاني يوم الصباح بدري , هم نظامهم يستقبلوا اول 6 مراجعين بدون موعد فقط.
اعطيتهم الاوراق الاولية واعطتني اللستة بالاوراق اللي لازم اجيبها بالاضافة الى خطاب موجه للاحوال انهم يعطوني برنت مع تعديل المهنة وخطاب كان موجه الكترونياً لمختبر جدة الاقليمي علشان نعمل تحليل الزواج.
جهزت الاوراق اللي طلبتها من الموظفة بالضبط ورحت للمختبر مع خطيبتي بعد 3 ايام برقم الصادر اللي اعطتني هوا الموظفة بمكتب الزواج ورحنا عملنا التحليل.
طبعاً كان عمل التحليل بمواعيد بس انا رحت بدون موعد الصباح بدري ولازم يكون مع كل طرف هويته + صورتين شمسية + دفع الرسوم كاش 900 ريال.
النتيجة طلعت بعد 4 ايام واتوجهت لمكتب الزواج على طول ثاني يوم بالطلبات اللي طلبوها.
طبعاً لازم يكون الطرف الاجنبي اللي هي الزوجة خالية من الامراض الوراثية وما تكون حتى حامل لاي جين مرض وراثي لانها حتترفض المعاملة.
سلمت الاوراق في ملف اخضر علاقي بدون تخريم للاوراق وكان يوم خميس.
الثلاثاء اللي بعده (بعد اسبوعين تقريبا) جت رسالة من المحافظة بورود معاملة جديدة طبعا برقم جديد غير الاول اللي قدمت فيه.
ضليت اراقب اجراءات المعاملة وثاني يوم جاتني رسالة من المحافظة لحجز موعد للشهود , رابط مع كلمة سر تدخل وتعبي بيانات وتختار موعد تروح فيه انت والشهود والغرض للتاكيد على المعلومات اللي بالملف طبعا رحت بعد يومين كان اقرب موعد انا والوالد واخوي.
بعد يومين جاتني رسالة من المحافظة انه المعاملة صدرت لامارة منطقة مكة المكرمة.
قعدت في الامارة 6 ايام واصدرت لوزارة الداخلية.
لما اصدرت جاتني رسالة برقم صادر مكون من 6 اراقم انه معاملتكم صدرت لوكيل وزارة الداخلية لشؤون الحقوق.
طبعا هي صدرت واتقيدت عندهم بعد 5 ايام بقيد سري, علشان استفسر عن المعاملة كنت اتصل على وزارة الداخلية 0114011111 على تحويلة الشؤون الامنية 04908 - 04909
وكانوا يقولوا لي معاملتك راحت لجنة سكرتارية الزواج, قعدت اتصل بشكل اسبوعي اتابع معام وبعد 42 يوم بالضبط جاتني رسالة من وزارة العدل انه توجد لديكم موافقة زواج ويللا ادخل وعبي بيانات توثيق العقد.
طبعا بعد ما عبيت البيانات جات رسائل مصادقة لي ولخطيبتي وابوها والشهود. والكل دخل صادق وبعد ما صادقنا جميعا اتصل علي الشيخ وحدد معاي موعد للعقد عن بعد ثاني يوم الصباح وقالي ان رابط الجلسة حيرسله قبل الموعد بربع ساعه وكل واحد لازم يكون جاهز بهويته.
وفعلا ثاني يوم تم العقد وصلى اللهم وبارك بعد ساعتين بالضبط جات رسالة لي ولزوجتي لوثيقة العقد.
الان لازم اسوي نقل كفالة لزوجتي من ابوها لي واجراءاتها جدة بسيطة :
تروح للجوازات ومعاك :
اقامة الزوجة وصورة منها.
هويتك وصورة منها.
جواز الزوجة + صورة منه.
تعبئة استمارة نقل كفالة.
وتكون مسدد رسوم نقل الكفالة 2000 ريال عن طريق البنك تروح لخدمات المقيمين او خدمات الجوازات( على حسب البنك) وتروح عند (نقل تابع لرب اسرة جديد).
بنفس الوقت تسلم الطلبات وتسلم الاقامة القديمة ويطبع لك الموظف الاقامة الجديدة ويكون مكتوب فيها زوجة مواطن.
الان تحجز موعد في الاحوال (تسجيل واقعة زواج سعودي من اجنبية) , تروح موعدك بالاقامة وصورة منها + هويتك وصورة منها + عقد النكاح + تعبي نموذج يعطيك ياه الموظف وبنفس الوقت يطبعوا لك كرت العائلة ومبروك يا وحش.
انا هنا اخيرا حاب انوه لشغلة , لا تلتفت لا لكلام الناس ولا للمعاملات اللي زيك طول ما اوراقك كاملة ومطبق الشروط امورك حتمشي.
اهم شرط لازم يكون عمر الزوج السعودي 30 سنة لان المخطوبة ليست مواليد اذا ما كنت تقرب لك اما لو في صلة قرابة من الدرجة الاولى او كنت مطلق يسمحوا لحد 25 سنة.
وبالتوفيق للجميع..
