أفكر بالطلاق بشأن نقل الكفالة

Question

بسم الله الرحمن الرحيم
السلام عليكم ورحمة الله و بركاته

تزوجت من مقيم عربي في وظيفة مرموقة و لي منه اطفال
سبب زواجه مني حسب حديثه للجميع : انه يريد الدين و الحجاب الخ .

ثالث اسبوع من زواجي فاجئني بضربه لي ضرب مبرح بسبب الشك
ثم بعدها بشهرين ( ثالث شهر من زواجي ) ضغط علي غصب عني في عمل توكيل عام له و اصدار سجل تجاري و الدخول في تجارة بإسمي
بعدها بأشهر قليلة خسر كل أمواله

الان الغيت التوكيل و اغلقت المؤسسة و السجل
لكني قبل عام نقلت كفالته علي بطلب مني انا لكي أريحه من رسوم تجديد الاقامة و لم اكن اعرف ان له اي مزايا اخرى
لأنه سألته مرة بحديث ودي : عن مزايا الزواج من سعودية ماديا فقال : لم يحدث لي شيء ابدا

الان اكتشفت ان له مزايا اخرى عديدة بمحض الصدفة
فتحت الموضوع معه وديا من باب العتب : لماذا لم تخبرني ان هناك مزايا اخرى !
صرخ في وجهي و انفعل و قاطعني ٥ ايام و الان يصر على ان اذهب الاحد للجوازات لأنقل اطفالي عليه وقد أساء لي كثيرا
و قال لي لن انساها لك اني سألته عن الموضوع و قال لي خسرتيني و سوف ترين مني وجه آخر


لكني افكر بأمر آخر
ان اتخلى عن كفالته حتى لو احترق المنزل بأكمله
لأني تعبت من زواج اتضح لي بعد سنين حجم المصلحة المبنية عليه
لا مانع عندي من جانب المصلحة
لكن اتعبني انكارها + مستوى الاهانات المستمر

حصلت على مسمى اسرة و اطفال لكني متعبة
لا اعرف ماذا افعل يوم الاحد وكيف اتعامل معه وهل الموضوع يستحق

وهل الموضوع حساس جدا لأي رجل و يستحق كل هذا الانفعال ؟ ولماذا يفعل معي هذا ؟

( و أفوض أمري إلى الله إن الله بصير بالعباد )

Comments

ماهي مزاية هههههه انا زوج مواطنة لايوجد مزايا غير تجديد الاقامة ٥٠٠ريال اول كان الو مزايا بس شالو كل مزايا منه خص نص عمل

Answer 1

وعليكم السلام ورحمة الله وبركاته

انا عن رأي الشخصي ان زوجك عصبي ولايتقبل النقد و المناقشات بشكل ودي وعقلاني وهذه ميزة سيئة.
ثاني شيء ثالث اسبوع من الزواج بدأ يضرب وهذا يعتبر علم احمر خطير جدا.

انا انصحك ان تروحي للمحكمة وتطلبي المشاورة في حالتك  اذا الطلاق أخير لك من البقاء في هذا الزواج التعيس لان الوضع في المستقبل راح يتفاقم للأسواء  
بالنسبة للأطفال البقاء في زواج فيه عنف يأثر عليهم اكثر من الطلاق لذلك حاولي تتفاهمين معه

تحياتي لك

Answer 2

بالنسبه لي زوجي سعودي ولا غير سعودي
لو مد يده علي
اولا وقبل كل شي راح اكسر له يده

ثانيا اخلعه
وبما انه غير سعودي وعلى كفالتي اسوي له خروج نهائي

واعلمه هو مين يوم مد يده ...

اما انتظره سنيتن عشان اكتشف حجمم المصلحه والكلام هذا فانتي الغلطانه من البدايه وسمحتي له بكل الي سواه

روحي المحكمه وارفعي خلع ولا تنقلي عيالك عليه لانه واضح بياخذهم وبيطلقك الا اذا انتي مستغنيه عنهم .. وصدقيني راح يستغلهم عشان يساومك انتبهي ثم انتبهي ثم انتبهي ..
النظام خلاص صار مع المراه يعني لو ضربك فيها 50 الف غرامه عليه
ولو اجبرك على نقل كفاله العيال بلغي الشرطه وراح يادبونه

احذرك وانتي براحتك شوفي وضعك

وسؤالي تقولين اكتشفتي مزايا وش هالمزايا غير التجديد و الرسوم ........ مالهم اي مزايا وللاسف حتى الوظايف كلها توطنت ولا يقدرون يتوطنون ولا يقدر يفتح تجارة ولا شي يعني لا مميزات
واذا فيه شي ما ذكرته ياليت تنوريني ...

Answer 3

اذا نقلتي كفاله راحت عليك

اولا اطلبي الخلع بسبب سوء المعامله
و سوي بلاغ هروب اذا لازم الأمر

كذا لفيتي يده .. صدقيني لو سويتي له نقل كفاله تندمي طول عمرك وانسي اطفالك اذا سافرو معاه ولا راح تدرين عنه

Comments

ليش اذا نقلت الكفالة عليه يمديه يسفرهم معاه اعتقد أنه لازم بموافقتها هي عشان يسمح له السفر بعياله

---

اذا العيال صاروا على كفالته
يعني هو المتحكم الوحيد فيهم ويسافرون بدون موافقتها عادي

---

جزاك الله خيرا بس للعلم ما تقدر تسوي له خروج نهائي يمديها بس تسوي له بلاغ هروب ...

Answer 4

نصيحة لوجه الله مثل المشاكل الأسرية شوفي جهة متخصصة مو هنا،
ولا تسمعي لنصيحة أحد مو مطلع على جميع المشاكل
واللي يقول ارفعي خلع كذا بيضيعك لأنه في قضايا الخلع بترجعي المهر كامل أو جزء منه والأصح ترفعي فسخ نكاح لوجود عيب وضرر من الزوج
واللي يقولك سوي خروج نهائي ترى مجرد الطلاق يروح الجوازات وبصك الطلاق ينقل خدماته لأي جهة يرغب فيها
ويقدر بعد الطلاق لو طلب خروج نهائي يتقدم بطلب حضانة ويعطوه عشان يقدر يسافر بأطفاله
كل الكلام اللي فوق من واقع تجربة لمعارف
فانتبهي وإذا تبغي نصيحة شوفي جمعية مودة ومو أي أحد تاخذي منه نصيحة

Comments

اجمل نصيحة قدمها لك الاخ  walrmadi
الاغلب هنا فاشل في ادارة اسرته وبيته فكيف له ان يقدم استشارة .. من طريقة ردو البعض تعرفي انه لايفقه تقديم النصيحة

---

شكراً  walrmadi كلامك سليم
بغض النظر عن أن الزوج أساء المعاملة وغلطان إلا أن مثل هذه المواضيع لا تُناقش هنا أبداً ولا يخلو أي بيت من المشاكل
فالافضل يا أختي ان يصلح بينكم شخص موثوق من جهتك ومعرفتك واذا هذا غير متوفر فتتوجهي لمستشار أسري موثوق والآن جمعية موده تقدم إستشارات أسرية بالجوال ولا تستشيري إلا جهة رسمية وهي الجمعيات الاسرية واخيراً هذا خلاف أسري وبينكم أطفال وما في احد منكم راح يكسب القضية حتخسرو الاثنين والله المستعان فحذاري من العجلة والاستعجال، وبخصوص موعد الاحد تقدري تأجليه بأي عذر حتى تحل هذه المشكلة.

---

الكلام الي تقولونه كلام ينطبق على شخص سوي وعاقل ممكن خانها ممكن كذب عليها او سرقها او حتى يكون مدمن عشان اروح موده واخذ منهم مشورة
لكن واحد من اول شهرين زواج ضاربها معليش
هذا واحد لايمكن تعديله وواضح مصلحته فقط الي يدورها ولو بيتعدل كان تعدل بوجود الابناء
واضح وضوح الشمس انه كان يبيها مصلحه فقط وفقط ولا عنده اي استعداد لان يجامل حتى لو بدايه الزواج  وهذا النوع الي مسبب ومخرب سالفه الزواج من الاجنبي
ماراح اعطي امل لاحد انه ممكن ينعدل لان هالاشكال ما تتعدل والكلام مو موجهه لغير السعودي فقط فيه نوعيات من البشر ما تتعدل والحل الانفصال هالاشكال لازم تتادب

وللمعلوميه
مو كل قضايا الخلع يرجع فيها المهر او جزء منه ترجع لراي القاضي الي يبت في القضيه
واما فسخ النكاح
اذا عندها دليل على الضرب ساعتها يؤخذ به ..
واخيرا معليش حنا مو فاشلين في ادارة حياتنا لكن نكتب الي نشوفه بدون مثاليه زايده ولا احتجنا رايك وتقييمك على ادارة حياتنا هي طلبت كيف تتصرف وكلن ادلى برايه ..

---

قد يكون ردك لها سليم لكن هل كل اللي هنا يصلحو للرد وحل المشكلة .؟
المقصد عشان تحل اي مشكلة لازم أخذ ورد وهذا الشيء مايصير في منتدى أو مجموعة عامة لابد شخص يمسك الموضوع وينهيه.

---

اختي ارجو ان يفهم كلامي صح .. الذي يرى كلامك يشعر بانك مريتي بتجربة صعبة في حياتك الزوجية فلا تقيسي حياتك على حياة الاخرين  واندفاعك في الرد وحكمك بانه لن ينعدل هذا تأكيد لما قلته انا ( ليس كل الموجودين هنا اهل لتقديم النصيحة ) .. فكم من زوج انصلح حاله بعد ما تدخل اهل الصلاح بينهم ..
نصيحة لك اختي صاحبة الموضوع ارجعي لمن هم اهل بتقديم المشورة والنصيحة

---

المضحك المبكي اللي يحاول يحل مشكلة ويسمع من طرف واحد ويروح يقدم نصيحة وهوا متكي على مكيف والله العالم تلاقيه مو قادر يقوم بشئون حياته، وإذا جاء ينصح يقولك ممكن يكون زوجها كذا وممكن كذا وممكن كذا ويبني نصيحته على إمكانيات مو داري عن شيء، وبكرة النهار لا انفصلت عن زوجها ولا بينفعها ولا بشيء، وبنصحيته يبغى ينتقم فقط من الرجال والعلم عند الله مر بتجارب سيئة في المحيط اللي حواليه، وعلى قولتهم كل إناء بما فيه ينضح، وكمان اللي على راسه بطحه يحسس عليها، ولو تشوف النصيحة تلاقيها ملخبطة ويقول كلام غير صحيح ولا يعرف الفرق بين الفسخ والخلع والطلاق، لكن أعان الله الغلابة والطيبين من الحمقاء