تجربتي زواج سعودية من اجنبي غير مقيم

Question

السلام عليكم

الحمدلله انتهيت من إجراءات موافقة زواجي من اجنبي غير مقيم.
الموضوع ما كان سهل، اعرف شعور الضياع والقلق والتيه خلال مرحلة الإجراءات خصوصا انه مافي تجارب كثيرة
من اكثر الأماكن الي ساعدتني هذا الموقع وعشان كدا قررت اطرح تجربتي كاملة هنا عن الخطوات للحصول على الموافقة.

أولا: استخيري الله واستعيني بالصبر والصلاة.
الموضوع مو بسيط ومباشر، محتاج صبر وطاولة بال. دعم شريكك النفسي مرة مهم، حاولي تشركيه معاك في كل خطوة إيجابية او سلبية.
لا تصدق لا تصدق لا تصدق اَي احد يزعم انه يقدر يسرع المعاملة وتخلص وتمشي. كذب واحتيال ونصب.
اصملي واصبري والمعاملة حتاخد وقتها وتخلص اذا ربي أراد في ٨-١٢ شهر ورتبي امورك على كدا.

نبدأ باسم الله

زواج سعودية بأجنبي غير مقيم

طلب موافقة زواج من وزارة الداخلية
1. البداية عن طريق تقديم ولي الأمر طلب عن طريق موقع ابشر
2. بعد عدة ايّام (٢-٣) تصل رسالة على الرقم المسجل في الطلب بزيارة مكتب الزواج بقسم الشرطة الرئيسي (جدة، حي النسيم)
3. تقوم المقبلة على الزواج بزيارة القسم للسيدات ( يجب ان تكون متواجدة شخصيًا) ايّام الاحد، الثلاثاء والخميس) لملئ بعض البيانات والأوراق والحصول على ورقة متطلبات الزواج بالتفصيل لإكمال الطلب (تأخذ تقريبا شهر للانتهاء من جمع كل المتطلبات)
4. بعد جمع كل المتطلبات وتقديمها لمكتب الزواج تصلك رسالة برقم المعاملة تحت التدقيق
5.  تصدر المعاملة الى محافظة جدة بعد اسبوع تقريبًا وتصل رسالة برقم الصادر
6. بعد ٥ ايّام عمل تصل الى مكتب المحافظة وتصل رسالة طلب حضور لأخذ موعد في قسم الزواج
7. بعد أخذ الموعد لدى المحافظة، يتم طلب ولي الامر، الخاطب، و٢ شهود لملئ بعض البيانات (عند عدم وجود ولي الامر او الخاطب كونه غير مقيم، يكتفي بحضور المخطوبة و٢ شهود)
8. تنتقل المعاملة الى إمارة منطقة مكة المكرمة ثم إلى الرياض لجنة الزواج (تأخذ المعاملة متوسط ٥ ايّام عمل للانتقال من إدارة الى أخرى، تصل رسالة الى رقم الجوال المسجل في الطلب عن رقم المعاملة الصادر ويجب ان تقوم بالاتصال على الجهة المستلمة للحصول على رقم المعاملة الجديد لدى هذه الإدارة)
9. تأخذ المعاملة ٢-٣ أشهر لدى لجنة الزواج ويتم المتابعة اون لاين عن طريق موقع وزارة الداخلية
10. حين يظهر الملف (مغلق) يتم الاتصال بوزارة الداخلية لمعرفة رقم المعاملة الصادر الى وزارة الخارجية .. هنا الف مبروك! حصلت على موافقة الزواج
11. يصل الملف الى وزارة الخارجية ويتم التواصل معهم للحصول على رقم المعاملة الجديد، تأخذ تقريبًا ١٠-١٥ يوم عمل حتى يتم إرسال المعاملة الى السفارة السعودية لدى بلد الخاطب
12. تقوم المخطوبة او ولي امرها بالتواصل مع السفارة السعودية في بلد الخاطب بعد وصول المعاملة للحصول على قائمة الطلبات  لتصديق العقد من السفارة
13. يجب ان يتم الزواج في بلد الخاطب والحصول على شهادة زواج إسلامي و شهادة زواج من حكومة بلده
14. بعد العقد ارسال جميع الاوراق المطلوبة الى السفارة السعودية مع دفع الرسوم عن طريق إنجاز .. انصح بالتواصل معهم وتأكيد تفاصيل المتطلبات كاملة




الف مبروك.. انتهى الماراثون الاول.. بارك الله لكما وبارك عليكما وجميع بينكما في خير


في وقت اخر راح اكمل باْذن الله إجراءات الاستقدام واجراءات فيزا الزيارة.
اذا في أي سؤال او استفسار انا حاضرة

Comments

هل اقدر اسوي زواج شرعي فالسعوديه بعدين ابدا باجراءات الداخليه .

---

ط438يب بالنسبة لابنة مواطنة وتبي تتزوج من من غير مقيم كيف الاجراءات

---

مرحبا اختي ايش الاوراق الطلوبة منك ناخديها معاك للسفارة

---

لا عزيزتي هيفاء الحصول على الموافقة امر أساسي لامكانية عقد الزواج بشكل شرعي

---

الف مبروك أختي
؟ بحال ذهبت الى بلد الخاطب انا وولي امري وسويت عقد زواج ببلد اقامة الخاطب ورجعت للسعوديه واتممت الاجراءات هاذي
اقدر ولاكيف ؟

---

بارك الله فيكم عزيزتي (حساب عمار) الف مبروك لكِ أيضًا
حسب معلوماتي لا يمكن ذلك الا بالحصول عالموافقة أولًا.
ذلك لأنه سيتعارض مع الخطوات بعد الحصول على الموافقة إذ انها تستلزم عقد النكاح في بلد الخاطب ثم التوجه للسفارة السعودية لمصادقتها مرفقة بقرار الموافقة على الزواج و تاريخه. فإن تم عقد الزواج قبل الحصول على الموافقة، كيف سيتم تقديم عقد نكاح بتاريخ جديد بعد تاريخ الحصول على الموافقة؟

للتذكير هذه الخطوات للموافقة على زواج سعودية من اجنبي غير مقيم

---

طيب حبيبتي ابغا استفسر كم كان عمرك لما قدمتي على الطلب وهل ضروري اني اكمل سنه ٢٥ كامل ولا اول ماادخل سنه ٢٥ اقدم الطلب ياريت احد يفيدني ضروري

---

ما يطلع من ابشر الخيار ممكن تشرحيلنا بس كيف نطلع الصفحة حقت ابشر

---

نعم عزيزتي رنيم مجرد ان يكون حساب عمرك بالهجري ٢٥ عامًا فما فوق

---

طيب حبيبتي انا سمعت ان شروط السن اتغيرت وصارت لازم سنك يكون ٣٠ هل صحيح هالكلام امانه اللي تعرف تفيدني؟!

---

صحيح سمعت نفس الشي من امارة منطقة مكة المكرمة، مكتب الزواج في شرطة مدينة مكة.
جربي تروحي بنفسك لمكتب الزواج في مركز الشرطة الرئيسي واسأليهم اذا الامر ينطبق على جميع المناطق او فقط مكة

---

انا دخلت على وزارة الداخليه وشفت الشروط مالقيت الشرط هذا مكتوب ٢٥ سنه

---

هذا امر جيد، من ناحية اخرى للاسف المواقع الرسمية مو دائمًا تكون updated بآخر الاجراءات والقرارات
لذلك انصحك بعد اجازة الحج تروحي بنفسك وتشوفي الموضوع شخصيًا على خير

---

حياك الله عزيزتي دارين
حسب ما اذكر، من حساب ابشر ولي امرك وليس حساب المخطوبة، تدخلوا خانة امارة المنطقة الي انتم تابعين لها، تلاقيها تحت خانة (خدمات واجراءات) او شي شبيه
طمنينا

---

اسماء الله يسعدك يارب للاسف مابدات ولا بشيء لاني ملخبطة ومافي معلومات كيف ابدا وايش المفروض اسوي لانو انا من مكة والشروط تقول انو المفروض يكون عمري فوق ال٣٠ وانا ٢٥

---

ماششاءالله تبارك اللهه مبروك بس حابه استفسر العمر كم لازم للبنت ؟

---

حياكم الله وبارك فيكم، اخر خبر عندي انه عمر الفتاة ٢٥ سنة

---

طيب الخاطب مو عايش ف بلده عنده اقامه ف بلد ثاني عادي العقد يصير مكان اقامته ؟

---

ماعندي فكرة والله، اتواصلي مع مكتب الزواج في الشرطة وهم عندهم خبر اكيد

---

ليش العمر فوق ٣٠ بالعكس عمرك مناسب للاجراءات

---

مرحبا اختي انا بتزوج اجنبي غير مقيم.. واخوي عملي موافقة زواج ولكن اخي مايقيم نفس المدينة اللي فيها معاملتي وللامانه مو متعاون معي يعني مررره مااعرف كيف اشرح لك.. المهم قالي اخوي خذي بياناتي وانتي سوي الموافقة انا مالي خص في الزواج.. المهم عبيت البيانات وحطيت رقمي علشان اتابع بنفسي وجات رسالة اني اراجع مركز شرطة جدة هل حضور ولي الامر ألزامي خاصتا زي وضعي او مثلا ممكن انا يوكلني او ايش الحل

---

طيب ابوك وينه
انا مثلك كانت عقدتي اخوي اللي هو الولي كان رافض زواجي بالمره لان ابوي متوفي بس امي الله لا يحرمني منها ضغطت عليه حتى اعطاني موافقه ووكلت اخوي الثاني ووقف معي حتى تزوجت والحين يارب لك الحمد زوجي زين معي ومع امي واخوي اللي زوجني يحبه مره

---

اجباري يكون هو اللي يمشي لك بالمعامله ويحضر للدوائر الحكومية

---

كم عمرك طيب لما قدمتي على المعامله

---

زوجي٣٠ وانا ٣٣
ماكان بينا فرق كبير بالمعامله

---

حياك الله لوتين، من تجربتي يستوجب ولي الامر في اول خطوة من أبشر.
بعد ذلك زيارتك للشرطة يستوجب فيها حضور المخطوبة شخصيًا وليس ولي الأمر. شخصيًا، نظرًا لظروف عمل والدي كثير السفر قمت بنفس طريقتك اضافة رقمي ومتابعة كل الخطوات بنفسي ولا يلزم حضور ولي الامر خلال المعاملة بتاتًا ولا متابعة اي دائرة. اذكر حتى طلبوا حضور ولي الامر في الامارة لتوقيع استمارة وكان الوالد الله يحفظه مسافر ورحت بنفسي والشهود وعملتها
كل شي تقدري تسويه بنفسك

---

انا معلمه 37 والي ابي اتزوجه بريطاني39 .
ماسبق لا لي ولا له الزواج. واسلم قبل شهر تقريبا. حابه اقدم على طلب زواج من اجنبي غير مقيم.
هل في الوقت الحالي لابد من دخول الاب لابشر بحسابه؟ او اقدر انا ادخل واقدم من حسابي خصوصا بعد القرارات الي صارت, هل ممكن او لا؟
هل صحيح الاب لابد ان يكتب خطاب لامير المنطقه؟
الله يسعدكم انا جديده هنا و ضايعه وقلقانه ماني عارفه شسوي بالضبط افيدوني

---

حياك الله ندى، اول شي الف مبروك خطوبتك، الله يتمملكم على خير يارب. :)
الخطوة الاولى انه الوالد او ولي امرك رسميًا يدخل على حسابه في ابشر ويقدملك طلب زواج.
لا عزيزتي للأسف لا يمكنك التقديم من حسابك. يتطلب التقديم من حساب ولي الامر وممكن في هذه النقطة تضيفي رقم هاتفك عشان تتابعي على الاجراءات بنفسك.
النقطة الثانية ممكن تروحي لمكتب الشرطة الرئيسي في مدينتك، في مكتب الزواج هناك و تسألي عن تفاصيل الخطوات كاملة من الموظفات.
ممكن تراسليني على ايميلي athebany@gmail.com اشرحلك كامل الخطوات لو احتجتي اي مساعدة :)
بالتوفيق والف مبروك مرة ثانية

---

الخطوة اللي تسويها اذا كنتي من جدة تخلي ولي أمرك يدخل على حساب الامارة ويسجل البيانات https://eservices.jed.sa/api/inbox/new/saudian_female_from_foreigner_marriage

انا اخوي موافق لكن قال لي انتي عبي البيانات وحطي رقمك انا مو فاضي للامانه.. قلت اوك اهم شي صورة من بطاقة اخوك او ابوك اذا عايش.. والباقي انتي عبيه سهل.. بعدها رح يجيك على رقم جوالك والايميل اللي دخلتية رقم المعاملة.. انتظري تقريبا اسبوع او اسبوعين رح تجيك رسالة ثانية يطلبون منك مراجعة شرطة جدة في حي النسيم عادي لاتخافين سهل الموضوع يطلبون منك اوراق اللي هي كشف الزواج الطبي ويطلبون من زوجك تحليل سموم الخاص بالمخدرات وشهادة خلو سجله من الجرائم الجنائية وبصمات ويطلبون منه ايضا اثبات مصدق من العمدة انه لم يسبق له الزواج من سعودية واذا صعب خلي ولي امرك يكتب اقرار بان هذا الرجل لم يسبق له الزواج من سعودية وايضا يطلبون من خطيبك تعريف بالراتب  وبس باقي الطلبات بسيطة

---

السلام عليكم ، انا من محافظه حفر الباطن كيف اعرف الموقع الي اقدم منه طلب زواج ؟ بحثت بالنت ماحصلت شي ، الله يسعدكم الي يعرف يعلمني

---

أنا قدمت ع طلب موافقة زواج سعودية من اجنبي غير مقيم و وصلتني رسالة انو معاملتكم برقم ... بمحافظة جدة صدرت إلى شرطة جدة برقم ( رقم مكون من 8 أرقام ) ،، ايش الإجراء الي لازم نسوي بعد هالرسالة هل مطلوب مني أراجع شرطة محافظة جدة ؟؟

---

ايوة خلاص تروحين انتي بس بنفسك للشرطة يعطونك ورقة فيها الطلبات بعد ماتكملين اوراقك ترجعين تسلمين كل الاوراق للشرطة

---

اي نعم عزيزتي روحي بنفسك للشرطه وخذي معاك بطاقه احوالك وصوره لجواز سفر الخطيب لان راح يطلبونها تتاكد من فارق العمر

---

انا نفس وضعك زوجي اجنبي غير مقيم رحت للشرطة وطلبوا مني بالنسبة لغير المقيم الرجل.. اختبار سموم "مخدرات" من معمل معتمد  ، طلب افادة من عمدة المدينة التي يعيش فيها الزوج الاجنبي انه لم يسبق له الزوج من سعودية، وبرنت من الادلة الجنائية في بلد الاجنبي بأنه خالي من الجرائم الجنائية، وتعريف من العمل بالراتب والمسمى الوظيفي، صورة من جواز السفر.. بعدها يتم ترجمتها للغة العربية اذا كانت دولة الزوج غير عربية من مكتب ترجمة معتمد..  بالنسبة للزوجة السعودية الاجراءات الروتينية ليست صعبة مثل تحليل الامراض الوراثية، برنت من الاحوال المدنية بالبيانات الشخصية، تعريف من العمل بالراتب والوظيفة، تطعيمة ماقبل الزواج واهم خطوة ذهاب ولي امر الزوجة السعودية لعمدة الحي وادلاء بزواج ابنته او اخته من الرجل الاجنبي المذكور في الأوراق.. وهاذي هي اصعب خطوة يمكن بسبب خلاف ولي الامر او عدم تعاونه في الزواج

---

عزيزتي مو الولي حيروح الامارة ليه يروح العمدة كمان؟ العمدة بس تحتاجي عشان تاكيد السكن ..

واذا الشخص اجنبي مو عربي وماسبق له الزواج كيف اثبت هل لازم يروح لمحامي؟

---

مرحبا سارة
يعتمد الطلبات حسب المحافظة او الامارة،
انا معاملتي في ٢٠١٧ زواج من اجنبي غير مقيم
ما طلبوا مني فحص مخدرات، ولا طلبوا افادة بعدم الزواج من سعودية سابقًا، كل الي طلبوه كان في الشرطة: شهادة خلو سوابق وصورة من جواز السفر

وفي الامارة: شهادة اسلام وتعريف بالراتب
مع الترجمة اكيد زي ما ذكرت الاستاذة لوتين.

---

من ضمن الطلبات اللي معي توثيق موافقة ولي الامر عند العمدة ويتطلب حضوره.. بالنسبة اثبات ان الزوج الاجنبي لم يسبق له الزواج من فتاة سعودية هاذي من مدينة الزوج مثلا لو الزوج امريكي يروح للعمدة المدينة اللي يسكن فيها ويعطونه ورقة انه ماتزوج سعودية.. او في حل ثاني أن ولي أمرك يكتب في ورقة أنا فلان ولي أمر فلانة اقر ان الخاطب فلان لم يسبق له الزواج من فتاة سعودية ويوقع فقط

هاذي الاجراءات لعام ٢٠٢٠ وهي الجديدة، انا الان وقفت عند ترجمة الاوراق ولكن رح اذكر لكم وش صار معي من تطورات

---

ممكن اعرف في اي امارة ؟

الله يوفقك حبيبتي طمنينيا وشو يصير معك, ولاتنسي تشاركينا تجربتك للفائدة

---

السلام عليكم،
انا الان وصلت مرحلة حجز موعد في محافظة جدة مع اثنين شهود و طلبوا ايضا حضور ولي الامر اللي هو اخي لكن الان هو خارج المملكة ف ايش الحل؟ ايضا ايش هي الاسئلة اللي يسألوها للشاهدين؟
يعطيك العافية

---

يعطيك العافية عزيزتي لوتين واتمنى لك كل التوفيق

---

وعليكم السلام ورحمة الله
اهلين عزيزتي لينا، اول شي الف مبروك
الله يسعدك ويوفقك ويتمملكم على خير
عادي مافي مشكلة تقدري تروحي بنفسك عوضا عن ولي امرك - انا شخصيا عملت كدا لأن الوالد كان مسافر أيضًا
وشاهدين سعوديين ، يشهدوا على صحة البيانات اثناء تعبئة الاستمارة عند الامارة وتسليمها لهم
بس حيتأكدوا من كل البيانات الي قدمتيها

---

انا في جدة تروحي إمارة منطقة مكة

---

عزيزتي اسما , هل طلبوا تصديق اوراقه اللي هي شهادة خلو سوابق و تعرف الراتب من الخارجية السعودية؟

---

حياك الله Top Fancy
نعم شهادة خلو السوابق يجب ان تصدق من السفارة السعودية في بلده و وزارة الخارجية في المملكة
بينما تعريف الراتب بس احتاج ترجمة معتمدة لانه بغير اللغة العربية بدون اي تصديق

---

يعطيك العافية عزيزتي

---

أسماء، أولا: مره شكرا على هذا الموضوع القيم انا سجلت في هذا الموقع بس علشان اتواصل معاك
استفساري :انا في أول خطوة و اللي هي تقديم على موافقة زواج سعودية من اجنبي
انا غير متواجدة في السعودية حاليا كمان موسهل ارجع مع العمل و كورونا لكن طلبت من الوالد يقوم بالموضوع
المشكلة: الوالد مااحد يرد على اسألته وكمان انا معاه في ضياع  لان مانعرف كيف نقدم على الطلب في هذه الحالة
الوالد كل ماسأل محامي قالوا له (لازم يكون في سبب كبير و مقنع لوزارة الداخلية عن زواج بنتك لأجنبي)!!
مااعرف كيف الاجراءات و انا خارج السعودية ، كيف ابدأها و ايش ممكن يساعدني
مررره احس اني في متاااهه

ممتنه لموضوعك و شكرا مره ثانيه لطرحك

انتظر ردك في اقرب وقت

مساءك سعيد

---

حياك الله عزيزتي نورة،
الف مبروك، الله يسهل امركم ويتمملكم على خير
اتواصلي معايا عالايميل
Athebany@gmail.com
حتى يستهل التواصل بيننا، واكون اسرع في التجاوب
راح اشرحلك كل شي بالتفصيل

---

بخصوص ردك ( نعم شهادة خلو السوابق يجب ان تصدق من السفارة السعودية في بلده و وزارة الخارجية في المملكة)

اصدقها من السفارة ببلد الخطيب وبعدين اصدقها من وزارة الخارجية هنا  ؟ يعني لازم يرسلي الاصلية ؟ هل طلبو السفارة السعودية اثبات معاملة زواج؟

---

السلام عليكم
ان شاء الله تجاوبي على سؤالي
لما تقدم لك الاجنبي وهو غير مقيم ماقالو لك ايش هي الاسباب اللي خلتك تتزوجينه لان شفت من الشروط لازم اقول الاسباب

---

وبعد قوليلي وش الاوراق اذا ممكن المطلوبه وهل ينفع القعد مكان اقامته ولا لازم بلده الاصلي !!

---

السلام عليكم ابغا استفسر دحينا انا قدمت اوراقي كلها والطلبات اللي طلبوها والمعامله راحت الامارة فالمدينه بس رجعو الاوراق بسبب انهم يبغو صورة جواز السفر حقت الخاطب تتختم من السفارة فبلدو او وزارة الخارجية بس لما راح عشان يختمها رفضو وقالولو احنا مانختم على صورة الجواز احد يعرف ايش السبب او فيه حل ممكن يساعدني بيه

Answer 1

ألف مبروك الله يتمم لك على خير والفال لنا يارب
كم مدة المعاملة من البداية للنهاية؟

Comments

الله يبارك فيكي عزيزتي..
عقبالكم يارب وانتي بخير وصحة وعافية
اخدت تقريبا ١٠ شهور .. قدمت في ديسمبر وخلصت في اكتوبر

Answer 2

الف الف الف مبروك الله يجعلها زواج الدهر و الله يسعدكم و يجعله قره عينك و يجعلك قره عينه ويرزقكم الذريه الصالحة لو ممكن تقول لنا الأوراق والطلبات الي طلبوها منك ؟
وهل ممكن عقد الزواج في بلد إقامته ولا ضروري في بلده الأصلي

Comments

نفس السؤال؟ الأوراق المطلوبة وهل يكفي العقد الشرعي ولا لازم الاثنين ؟

Answer 3

لو سمحتي ازا انا غير مقيمة و خطيبي قدم على معاملة زواج و كانت في قسم الاتصالات الادارية وزارة الداخلية و ثم الا مارة .. هل هناك مشكلة ما ؟؟ علما انني غير مقيمة و لازم من الداخلية تنتقل الى الخارجية

Comments

انا نفس حالتك تحولت من الداخليه للاماره ثم المحافظه و خطيبي هو الاجنبي غير مقيم ، ولسا ماعرف ايش السبب :(

Answer 4

اختي لو سمحتي رسلت ليكي ع ملفك سؤال ارجو الرد ضروري لو سمحتي

Comments

اعتذر للتو شفت رسالتك :(

Answer 5

الف مبروك و بالرفاة و البنين

Comments

جزاك الله خير وبارك فيكم :)

Answer 6

انتي تقولي لاتصدق لاتصدق لاتصدق احد يسرع المعاملة كله كذب ونصب  واحتيال وانا اقولك في ناس تمشي معاملات اذا مواليد السعودية يجيب الموافقة خلال شهر ونص بس بملغ كبير تقريبآ من ٢٥ الى ٣٠ الف اعرف ناس دفعو المبلغ هذا عشان مايخسرون اشغالهم مو عشان عندهم مشكلة فالتحاليل او غيره في ناس مايسمحون لهم يغيبون من اشغالهم كل اسبوع

Comments

حياك الله ا. صالح
اكيد طال عمرك اذا بتدور بتلاقي الفاسدين والمرتشين موجودين
اللي حابب يبدأ حياته بلعن ومال حرام ومحق بركة وفساد في الارض و مخالفة قوانين الدولة فالله ييسرله :)
الي بقوله للآنسات المقبلات على الزواج، اصبري واصملي وتابعي اوراقك وربنا حييسرها باذن الله. لا تدخلي في متاهات  انتي في غنى عنها وخلي فلوسك فجيبك اتهني فيها انتي
والله يوفق الجميع لما يحبه ويرضاه

---

الله يهديك المعقبين والمحاميين فاسدين و مرتشيين ، انا اقول في ناس ماعندها وقت تروح تجري ورا المعاملة ف يسوون وكالة ل المعقبين والمحاميين عشان يخلصون معاملاتهم هذي لا هي رشوة ولا فساد ولا مخالفة للقانون الله يحفظك ارجعي اقرئي كلامي ومعليش ترا ماتوفقتي فالرد تقولي يبدأ حياته بلعن و مال حرام وفساد فالارض
اللي يحلله الشرع تحرمه الناس هذي مشكلة

---

الله يعطيك العافية استاذي الغالي، وحقك على عين وراسي واعتذر منك لو بدر مني خطأ
ممكن تنورنا جميعًا هنا للفائدة العامة ايش هي الطريقة الرسمية من الدولة للتقديم على طلب موافقة زواج سعودية من أجنبي؟
وهذه المبالغ (٢٥-٣٠- وجائني اشخاص من تجربة شخصية دفعوا ٥٠ الف وحصلت على الموافقة خلال اقل من شهرين من اجنبي غير مقيم) لمن يتم دفعها وكيف يتم الحصول على الموافقة بشكل اسرع؟ اي خطوة ؟
وأين توجد في لائحة الاجراءات والأنظمة الرسمية للدولة؟
اعرف كثير ناس والله تأخرت معاملاتهم خصوصا مع الجائحة الاخيرة. لو تنورنا وتنول فينا ثواب نكون لك من الشاكرين

---

الله يعينك على نفسك هذا اللي اقدر اقوله لك وياليت ماعاد تردين عليا

---

اللهم امين جميعًا

Answer 7

أول شيء الف مبروك الله يهنيكم ببعض
ثاني شيء عندي استفسار هل مطلوب انو المخطوبة تكون عاطلة عن العمل ؟ أو هل في مشكله لو كان عندها سجل تجاري ؟

Comments

عادي المخطوبة تكون موظفة او عندها سجل تجاري وراتبها اعلى من راتبك

Answer 8

ألف مبروك الله يتتمملكم على خير انشاءالله! انا ماشية في نفس مشوارك بس معاملتي لسا في الداخلية الله يفرجها انشاءالله بس حبيت اعرف منك ايش كانت قائمة الطلبات الي طلبوها لتصديق العقد من السفارة؟

Comments

الله يبارك فيك ويتمملكم على خير ان شاء الله.
الف مبروك لكم
بالنسبة للشروط تختلف حسب بلد الخاطب. بالنسبة لي كانت عقد زواج اسلامي ، وعقد زواج بالولاية، جواز السفر للزوج، التقرير الطبي، شهادة اسلام، شهادة خلو سوابق وصور شخصية اذا لم تخني الذاكرة

---

كم عمرك كان لما قدمتي ع المعامله؟!

---

حياك الله عزيزتي رنيم،
كنت بالتقويم الهجري ٢٧ عاما والميلادي ٢٦
في مكتب الزواج في مركز الشرطة حسبوا عمري بالتاريخ بالهجري

---

هذا كان في ديسمبر ٢٠١٧م اتمنى أكون جاوبت استفسارك، لو احتجتي اي شي ثاني انا موجودة :)

Answer 9

مرحبا اسماء
شكرا على مشاركتك وعلى مساعدتك فعلا افدتيني واكيد استفادو ناس كتير يعطيكي العافيه ويجزاكي الله خير
عندي سؤال بسيط.. معاملتي في الداخلية في سكرتارية لجنة الزواج من خمسة شهور وانا عارفه اتأخرت بسبب الاوضاع بس عندك فكره بعد كدا فين حتروح؟ وكم جلست في السكرتارية لجنة الزواج معاملتك؟ شكرا ليكي بانتظارك

Comments

الله يحييك رزان، الف مبروك والله يتمم فرحكم على خير
بعد لجنة الزواج تروح على الشؤون الامنية، اخذت تقريبا اسبوعين او ثلاثة اذا ماخانتني الذاكرة وبعدها تروح على وزارة الخارجية عشان تترسل لسفارة السعودية في بلد الزوج اذا كان زوجك غير مقيم، اذا كان مقيم فتروح للمحكمة والله اعلم
انا اخذت تقريبا شهر ونص واى شهرين في لجنة الزواج
الله ييسرلك الي فيه الخير ومع الاوضاع الاخيرة اشياء كثير اتعطلت الله يتمم فرحكم بخير

Answer 10

الف مبروك عزيزتي أسماء
ربي يتمم عليكم:))
سؤال هل يلزم الذهاب لبلد الخاطب ولا يكفي ارسال الاوراق؟

Comments

الله يبارك فيك ، والعاقبة لكم بالمسرات :)
يلزم الذهاب لبلد الخاطب لعقد النكاح وتوثيقه رسميًا في بلده ثم السفارة السعودية هناك
لأن الخاطب غير مقيم فيصعب دخوله الى المملكة وعقد النكاح في محاكم الاحوال الشخصية بالسعودية

---

أختي ياريت ترشديني

انا تزوجت قبل 3 سنوات زواج مدني(زوجتي فرنسية ) وعندي عقد زواج مدني لاكن ماسويت زواج اسلامي طبعا بدون موافقة وللحين ماعندي اطفال من الزواج
والان بدل ما انتظر لطلب تصحيح وضع 7 سنوات راح ارفع طلب موافقة زواج ولما تطلع الموافقة أن شاءلله ابي اسوي عقد زواج شرعي او اسلامي في بلد زوجتي .
هل راح يصادقون على عقد الزواج المدني  اللي كان قبل الموافقة و الشرعي الجديد اللي بعد الموافقة ولا راح يرفضون الموافقة؟

الله يسعدك

---

حياك الله اخ احمد،
ماعندي فكرة والله، لكن صعب تقدم اثباتين للزواج بتواريخ مختلفة.
من تجربتي طلبت السفارة السعودية في امريكا الاثباتين المدني والاسلامي.
شفت طريق تصحيح الاوضاع؟ ايش كان ردهم؟

---

مشكورة على الرد

رحنا السفارة السعودية في باريس قالوا ماراح يرفعون طلب تصحيح الا اذا مر على تاريخ الزواج 7 سنوات لان ماعندي اطفال و 5 سنوات اذا صار عندي اطفال.
انا ماقدر انتظر واكون بعيد عن واهلي كل هالسنوات عشان كذا الأخوان بالمنتدى ينصحوني اقدم طلب موافقة بدل الأنتظار.

الله يسعدك