في تصنيف ازواج السعوديات بواسطة مستشار أول (529ألف نقاط)
السلام عليكم ورحمة الله وبركاته،، حبيت وبناء على طلب الاخوة بسرد قصتي مع نقل الكفالة بجوازات جدة، اليكم التفاصيل (اعذرونا بكتب بالتفصيل الممل)... قدمنا المعاملة عن طريق القسم النسائي يوم الأربعاء 17-4-2013 (طبعاً الرقم سحبناه يوم الأثنين الي قبلو) وتمت المطابقة وطلبو تصوير المعاملة نسختين متطابقة وارفاق نموذج تعديل المهنة (متوفر عند الكتاب خارج مبنى الجوازات) الرسوم مسددة بالكامل قبل التقديم (5000 ريال نقل للمرة الثانية مع 1000 تعديل مهنة)، بعدين قالولنا راجعونا بعد اسبوعين عند شباك رقم 10 واحضار نموذج الجوازات لاعادة الطباعة (متوفر عند الكتاب ايضاً)، تمت المراجعة بعد اسبوعين ونصف طبعاً اديناهم اكثر من المده المحددة، وبعد مزاحمه في القسم النسائي خرجت زوجتي بعد ساعتين تقريباً من التدافع، الغو الأرقام وقتها وسارت نظام سرا والحرمه القوية البنيه مفتولة العضلات هي الي بتوصل للشباك اكيد، خرجت زوجتي من الصالة بإنهيار عصبي وبالقوة فهمت انو ما قدرت توصل الشباك، بعد تهدئتها سألنا الكتاب الي برا ، قالو اسحبو برنت من الجوازات (طبعا احنا اشتركنا بخدمة ابشر ومشيكين وما سحبو لا فلوس ولا اتنقلت الكفالة) وبرضو قلنا امكن ما اتحدث النظام، رحت سحبت برنت ولسه زي ما هي، قالولنا لا تجو الا لمن تظهر في خدمة ابشر انو نقلت الكفالة.. راجعنا بعد 3 اسابيع نفس الحكاية، ورحنا بعد شهر ساعتين انتظار وصلت زوجتي للشباك (اخيراً) وببرود موظفة الجوازات الموقرة تقولها: المعاملة مهي عندنا وديناها قسم الرجال، راجعوهم ولا قدمو معاملة جديدة احتمال ضاعت!! خرجت زوجتي تعبانه على الاخر، ونقلتلي الخبر، الحمد لله انو يومها كنت متوكل على الله انو كل شي حيتسهل بإرادة رب العالمين، دخلت قسم الرجال وقعدت اترجى المراجعين فين الشخص الي يفيدني وين معاملتي راحت، بالقوة خلوني اكلم العسكري على شباك نقل الكفالات الي ما عبرني اصلن، ولا رد عليا وبيكلم صاحبو الي وراه، في واحد شخص ملتزم بلحية (كل ما اتذكرو ادعيلو بالخير) قلي راجع شخص اسمو المقدم/ عصام الجهني، مكتبه اخر شي عند المسجد باب ابيض المنيوم، رحتلو الباب كان مقفل، انتظرت في الشمس ابو نص ساعة لمن فك شخص من جوا الغرفة، دخلتلو اول مره طلعنا برا، المره الثانية، الثالثة لمن رضي اسألو (هو قمة في الاخلاق بس مع الزحمة مو طايق نفسو ما الومو والله) سألتو قلي معاملتلك انا شايفها، واكدلي انها في ودورنا عليها مالها اثر، طبعا انا ما اعتمدت على كلامو وجهزت معاملة جديدة،وراجعتو الاسبوع الي بعدو، وطابقلي الأوراق بدون حضور زوجتي (بعد ما دحلستو اكيد) واخد المعاملة ووعدني يخلصلي هي، وفعلاً صدق 4 ايام كانت منقوله ومتزبطه، المعاملة القديمة شهر وما سار شي وضيعوها، المعاملة الجديدة 4 ايام، جيت ثاني يوم وطبعتها (بدون عبارة غير مصرح له بالعمل) مكتوب صاحب العمل (اسم الزوجة) ورقم رخصة العمل.. اقامتي كانت تنتهي في 16-12-1434 ه، يعني باقيلهي قرب 5 اشهر، قلت اجددها مره وحده عشان عندي سفر اخر رمضان وما اقدر ارجع اجدد واسافر ثاني، اتوجهنا مركز التحلية لمكتب الجوازات، الاثنين الي بعدو على طول، جا رقمنا وجددلي سنتين وكانت الكارثة، اختفى رقم رخصة العمل، صاحب العمل اصبحت مرافق مع و (اسم زوجتي) ، المهنة: زوج مواطنة، وتحت الصورة ما يحتاج.......غير مصرح له بالعمل سألت العسكري ليه سارت كدا؟ حاول يسوي اعادة طباعة ما نفع، قلي ما عندنا الصلاحيات نشيلها هنا عشان السستم عمالة منزلية وكدا وما نزلولهم النظام الجديد،قلي راجع جوازات الكندرة، طبعا ما اقولكم كيف قفلت الدنيا في وجهي استغفر الله ورجعلي كابوس مراجعة الجوازات الي افتكرت انو خلصت منه، رحت الجوازات بدري 7 الصباح، وصفيت سرا في الطباعة (افادوني انو اعمل اعادة طباعة عند نفس العسكري وتروح انشالله) بعد ساعتين في السرا، الموظف يقلي ما جا امر الطباعة ورمى المعاملة في وجهي، سألت الي جنبو قلي روح شباك 24 في صالة نقل الكفالات... رحنا الشباك والسرا برا الصالة والدنيا فوضه جوا، وفي 300 شخص قدامي اذا مو اكثر، بعد المضاربات وصلنا للشباك، وقلي عند واحد اسمو حامد القرني (مو عندو هو) رحنا لحامد قلي صور نموذج اعادة الطباعة 3 نسخ وتعال، رجعتلو اخدها وراح اخر شباك عند واحد عدلها، قلي استنى ربع ساعة وروح عند واحد اسمو لاحق في الأوامر، رحتلو وطبعلي هي ما اتغير شي بس تحت الصورة مكتوب (مصرح له بالعمل) والمهنة: زوج مواطنة، ومرافق مع (اسم زوجتي)، قلي دا النموذج الصحيح لمن سألتو فين رقم رخصة العمل، قلي اسمك اتسقط من مكتب العمل، ودا الشكل الصحيح للاقامة مرافق مع وليس صاحب العمل، والمهنة مكتوبة: زوج مواطنة. الحمد لله تم الانتهاء من الكابوس، وجددت سنتين والآن باقي المدة سنتين و4 شهور تقريباً اشكر كل شخص كان له يد في مساعدتي او توجيهي، ولو ان بعضهم حتى لا اعرف اسمائهم، لكن الله يجزى بالخير كل من وقف بجانبي وخفف عني المعاناة ووقفات الشمس (جتني ضربت شمس مرتين وسخونه والحمد لله عدت) كل الشكر والتقدير للمقدم/ عصام الجهني، على مساعدته رجل خدوم بمعنى الكلمة يستحق كل تقدير واحترام. سامحوني على الاطالة، بس حبيت اطرح بين يديكم قصتي كاملة لعل وعسى ينتفع بها القاصي والداني والله ولي التوفيق، اي سؤال انا حاضر...
بواسطة مستخدم جديد (14.3ألف نقاط)
فين موقع حامد القرني وايش هو النموذج حق إعادة الطباعة والتجديد مين اللي يسويه
بواسطة مستشار أول (529ألف نقاط)
موقع في صالة تجديد الاقامات اخر الجوازات يسار ، نموذج اعادة الطباعة هو نفسو نموذج الجوازات الموحد الي يستعمل للتجديد والنقل واصدار تأشيرة الخروج والعودة، وانت تسويه بنفسك
بواسطة مستخدم جديد (14.3ألف نقاط)
أرسلت لك رسالة على الخاص وصلتك تحياتي

1 إجابة واحدة

0 تصويتات
بواسطة مستشار أول (17.6مليون نقاط)
تسلم ايدينك .. وألف مبروك .. وعقبال الجميع يارب ....
مرحبًا بك إلى مجتمع أبناء السعوديات سؤال وجواب ، حيث يمكنك طرح الأسئلة وانتظار الإجابة عليها من المستخدمين الآخرين.

13.5ألف أسئلة

25.7ألف إجابة

30.8ألف تعليقات

16.9ألف مستخدم

...