مساء الخير اخواني واخواتي الاعزاء
بإختصار شديد الموجودين في الرياض ياريت يتوجهوا لجوازات الخرج عشان يخلصوا امورهم بأبسط الطرق واسهلها من الناحية الإجرائية.
اليوم انا وصلت جوازات الخرج الساعة 11 وربع الصباح زوجتي انتهت من المطابقة في دقيقتين فقط وبعدها دخلت عند الرجال ولا عشرة دقائق على بعضها الا وهو منتهي.
بس واجهتني مشكلة مسيطه انه العسكري الخاص بنقل الكفالات طبعي لي نسخة مكتوب عليها غير مصرح له بالعمل. يوم سألته قلي ماهي مشكلة ابدا ً , بس ما ارتحت للموضوع عاد دخلت لمدير شعبة الوافدين ووريته الملاحظة قلي روح لناصر وهذا عسكري لطيف جداً وانسان يستمتع بعمله وهو في قسم الاضافات رحت عنده بكل بساطة اخذ النسخة وارفق من عنده معاها نموذج وقلي اطبعها من عند حمد
ملاحظة مهمة : يقولي قول لحمد (عسكري في قسم الاضافات ايضا) يطبعها لك على النافذة وليس طباعة عادية , قلت ابشر
رحت لحمد ( احد اكثر الموظفين السلسين ) اللي شفتهم في حياتي في دائرة حكومية وفي الجوازات بالتحديد ماشاء الله تبارك الله عليه سلس وسريع
سلمته النموذج والاقامة مدبسة على النموذج وفي اقل من دقيقتين وانا واقف سلمني النسخة الجديدة معدله وبدون العبارة وايضا فيها رقم رخصة عمل. وانتهيت والحمدلله
ملاحظة اخرى: لاتوجد هناك رسوم او اوراق خاصة بتعديل المهنة, العسكري يقلي خلاص بمجرد النقل على الزوجة تصبح المهنة تلقائية زوج مواطنة يقول لاننا نحتاج صورة عقد النكاح فقط لكتابة زوج مواطنة وليس عليها اي رسوم ولا اوراق ولا يحزنون.
ملاحظة واحدة عكرت مزاجي : وهي انه الموظف قلي كم دفعت يعني كم سددت قلت له 4000 ولكن هل اقدر استرد ال 2000 ريال قلي نعم تقدر - على اساس انه حيسحب 2000 ريال وانا استرد الفين . خرجت مبسوط ويوم روحت للصراف الا وصاحبنا قد سحب الاربعة الاف كلها.
قلت يارجال تاخذها يوم الجمعة في الظهر( مثل مكاوي) يعني يوم القيامة
خرجت من الخرج وانا ادعي للموظفين ومديرهم بالتوفيق على التعامل السلس والجميل وسرعة الانجاز ( ماشاء الله تبارك الله عليهم ). وفي نفسي شي على الالفين اللي راحت مني بدون وجه حق.
لان مديرهم قلي النقل بألفين.
السؤال كيف استرد هذا المبلغ ؟
خاصة انه رصيدي في موقع الداخلية - اصفار
وشكراً جزيلاً لكم