السلام عليكم ورحمة الله وبركاته ,,,
اخواني ياريت احد يفيدني بعد معاناة في الاحوال ...
طبعا حجزت موعد في الاحوال بإسمي انا الزوج ( زوج مواطنة ) بعد انتظار اكثر من شهر للمواعيد في احوال الصفا بجدة .
توجهت للاستقبال شاف الاوراق كاملة :
1- ايصال غرامة التأخير ب 50 ريال .
2- عقد الزواج الاصل مع صورة .
3- الاقامة الاصل مع صورة .
4- هوية الزوجة الاصل مع صورة .
5- جوازي الاصل مع صورة .
6- جواز الزوجة الاصل مع صورة .
توجهت للدور الثاني وبما انو رقمي كان مطول روحت لأحد الكونترات اسألو عشان لا انتظر كثير قاللي معاملتك عند واحد اسمو (.......) قولتلو طيب فينو قاللي انتظرو الين ما يجي انتظرت اكثر من نص ساعة ولا جا روحت للموظف قاللي روح للادارة واسأل روحت للادارة قاللي روح عند واحد اسمو (......) واسألو برضو مو موجود .
بعدين روحت لكاونتر ثاني سألتو عن معاملتي قاللي لازم تعبي اول شي ورقة اسمها تحديث بيانات نزلت الاستقبال مرة ثانية وطلبت الورقة حقت تحديث البيانات لقيت فيها بيانات مالها اي دخل في معاملتي زي المؤهل العلمي وما يثبت ذلك ومحل الاقامة وما يثبت ذلك وطلبات مالها اي دخل في معاملتي ولا عمرو احد ذكرها في هذا المنتدى ابدا
سألتو انو طيب المعاملة بإسمي انا اللي اعبيها ولا زوجتي قاللي زوجتك قولتلو طيب لما اعبيها واجي تتغير الحالة لي ولزوجتي قاللي بس لزوجتك اما انتا مالنا اي صلاحية نغير حالتك روح غيرها في الجوازات ؟؟؟؟
قولتلو طيب نظام ابشر مرتبط بالاحوال وانتو اللي تغيرو الحالة وكل الناس في النت كاتبين انو غيروها من الاحوال قاللي لا انا بقولك غيرها من الجوازات انتا معاك اقامة ومالنا دخل في الاجانب !!!
المهم انتظرت الرقم في الدور اكثر من ساعتين ولما جا رقمي توجهت للكاونتر شاف الاوراق قاللي لازم اول تنقل كفالة على الزوجة وبعدين تجينا ؟؟؟ قولتلو طيب ما ابغا انقل انا على زوجتي ابغا اخلي مهنتي زي ما هيا ما ابغا اغيرها زوج مواطنة قاللي معليش ما نغير الحالة ابدا ...
في الاخر طلعت بدون ما استفيد اي شي وزي ما روحت زي ما جيت ..
وهذا اللي سار معاي بالتفصيل ...
يا اخوان الرجاء من اللي يعرف او عندو اي معلومات يفيدني ...؟
وهل لو روحت لمكة او اي فرع ثاني ممكن اسويها ؟؟؟
بصراحة مو عارف ايش اسوي ارجو منكم المساعدة وهل كلام الاخوان اللي في الكاونترات صحيح ؟؟ لاني ما عمري قريت في المنتدى انو احد مر بمثل اللي انا مريت فيه ابدا ؟؟؟
وسامحوني ع الاطالة بس والله من قلة حيلتي مو عارف ايش اسوي ..؟
