Untitled 1

يمكنكم الإنضمام في مجموعة أبناء السعوديات على برنامج التليجرام عبر الرابط التالي:  https://t.me/saudison

سُئل في تصنيف ازواج السعوديات بواسطة مستشار أول (171ألف نقاط)
عُدل بواسطة
السلام عليكم ورحمة الله وبركاته


حابه اتقل لكم تجربتي بالتفصيل، و أساعدكم قد ماقدر زي ما انا لقيت تجارب من قبل ناس تانية ساعدتني وخلت عندي فكرة كيف بتكون إجرائات المعاملة.

* كل الخطوات انا عملتها بنفسي وكنت اروح واجي لوحدي يعني مو لازم ولي الامر يكون معاك *

أول حاجة معلومات بسيطة عني وعن الخاطب:
 - سعودية
- ٢٦ سنه
-ربه منزل
- لم يسبق لي الزواج

الخاطب:
- يمني مواليد السعودية
-٢٩ سنه
- يشتغل قطاع خاص
- لم يسبق له الزواج


أول خطوة قمت بتقديم للعاملة عن طريق الانترنت عن طريق موقع محافظة جدة ( احنا الاثنين من سكان جدة) ورح احط لكم الموقع بالاسفل:
https://eservices.jed.sa/api/inbox

البيانات رح تكون عن ولي الامر والمخطوبة، تقريبا بعد يوم أو يومين رح يوصل رسال نصية لجوال ولي الامر أن المعاملة ذهبت لقسم شرطة جدة في حي النسيم. ( مهم تكوني عارفة رقم هوية ولي الامر ورقم الطلب يلي يوصل في الرسالة)

*تاريخ الاصدار كان ٥-١٢-١٤٤٠/ وقتها كان خلاص رح تبدء اجازة الحج، وحتى بعد الاجازة ماكنت اعرف اني لازم اروح الشرطة، احسب في رسالة تانية رح يبلغوني ايش اعمل، لمن سالت عرفت انو انا لازم اروح الشرطة واشوف الوضع*

بعدها بيومين او ثلاث أيام تراجعي عند الشرطة في قسم النساء. (طبعا في كل مكان لازم معاك هويتك)

أول زيارة لقسم الشرطة:
١- يكون معاك صورة لهوية الخاطب ( إثبات انه بيشتغل)
٢- يكون عندك صورة من شهادة الميلاد اذا كان مواليد السعودية

قسم الزواج في ٣ مكاتب انت وحظك معاملتك تكون مع أيت وحدة هناك، صدقيني اهم شي التعامل الكويس والكلمة والدعوة الحلوة للموظفة وكل امورك تمشي ان شاءالله

بعدها رح تعطيك قائمة الطلبات رح تحتاج منك شهر تقريبا لتجمعيها وترجعيلهم ثاني عشان تقدمي المعاملة:

للمخطوبة:
١- صورة للهوية الوطنية مع احضار الاصل للمطابقة
٢- برنت من الاحوال المدنية ( تتاكدي انو كل بياناتك عندهم صحيحة، تقدري تعدلي عليهم لو في شي غلط)
يعني اذا كنت موظفة و مكتوب عندهم طالبة لازم تغيري، و لو مكتوب طالبة وانت ربه منزل برضوا لازم تعدليه وهكذا
٣- رح تعطيك ورقة بموافقة ولي الامر على الزواج  ويختم من عمده الحي
٤- اذا موظفة تجيبي تعريف بالراتب، واذا طالبة تعريف من الجامعة، واذا ربه منزل رح تعطيك ورقة انك ربه منزل مع ٢ شهود وتروحوا عند عمده الحي يشهدو ويوقعوا ويختم عليها عمده الحي
٥- الفحص الطبي الاصل و صوره منه للمطابقة
( وفي طلبات اضافية للمنفصلة و الارملة)

الخاطب:
١- صورة للهوية الوطنية مع الاصل. ( اذا كانت التاريخ يلي في البطاقة مو نفس السنة يطبع من موقع ابشر اثبات انها مجددة)
٢- صورة لجواز السفر مع الاصل
٣- كرت الادلة الجنائية
٤- مشهد مصدق من العمدة ان لم يسبق له الزواج من سعودية
٥-تعريف بالراتب مصدق من الغرفة التجارية
٦- خلو سوابق من البلد الام ( لانه من اليمين لايشترط انو يروح بنفسوا يقدر يوصي اي احد من اهله اوومعارفه باليمين طبعا تاخد الورقة هاذي شهر فقبل اي شي يبدء في اجرائات هاذي الورقة) بعد ماتوصل الورقة تتصدق من السفارة اليمينة يلي في وزارة الخارجية+ ختم وزارة الخارجية
٧- مو متاكدة اذا مطلوب كمان شهادة الميلاد نسيت صراحة

ملف اخضر علاقي من دون تخريم الاوراق *نقطة مهمة*

ثاني خطوة بسم الله نبدء خلاص عرفنا ايش المطلوب مننا:

١- انا أول حاجة عدلت بياناتي في الاحوال وبعدين اعطيهم الخطاب يلي من الشرطة انو يطبعوا ليا برنت موجهة من الاحوال للشرطة

٢- رحت انا وخطيبي لمستشفى المحجر كل واحد مننا رح ينطلب منه ٢ صورة شمسية + صورتين لبطاقة الاحوال وطبعا يكون معاكم الاصل، مافي مواعيد اون لاين بس تروحوا ٨ الصباح، وخلو بالكم انو اوقات يقولوا السستم دوان حق الاجانب يعني ممكن بعد ساعتين رح تخرجوا!
الطرف الغير سعودي رح يدفع ٧٠٠ ريال حق تحاليل الدم، وجمبهم في مركز تاني حق السموم والمخدرات رح يدفع كمان ٥٠٠ ريال هناك

٣- هو راح قسم الشرطة اتوقع عادي اي قسم عشان يعمل كرت البصمات الجنائية

٤- زي ماذكرت انو هو من اول بدء في الورقة حق الجنائية يلي من بلده

٥- كل واحد يخلص الاوراق يلي عنده يلي تحتاج تصديق من عمده الحي حقه

تحاليل الدم والبصمات تاخد تقريبا ١٠ ايام عمل كل وحدة فيهم عشان تطلع النتايج

* نصيحة بعد ماتجمعوا كل الاوراق المطلوبة اعملوا منها نسختين او ٣ خلوها عندكم*

ثالث خطوة:
بعد تجميع الاوراق المطلوبة وديتها قسم النساء في الشرطة لنفس المسؤولة يلي رحت لها اول مرة وكدة اكتملت المعاملة ويرسلوها للمحافظة.
بتاريخ اذا ماكنت غلطانة انو ٢٧/١/١٤٤١

دحين تبدء لحظات الانتظار والحيره، والواحد مايعرف ايش الخطوة يلي بعدها، لكن داىما خلو ايمانكم بربنا كبيرة وتكون نيتكم صافية

عدت الايام والاسابيع و مو عارفة ايش صار، لين رحت الشرطة استفسر و قالولي روحي قسم الاتصالات ومن دا الكلام، وماكنت بتطلع المعاملة عند قسم السيدات، رحت قسم الرجال وطلع لي هي، قالي هي راحت المحافظة اعطاني رقيم قيد والتاريخ قالي بعد ١٠ ايام راجعي عندهم
كان هذا بتاريخ ٢٤/٢/١٤٤١ يعني بعد تقديم المعاملة بشهر تقريبا

وقتها كان عندي سفر وسافرت ورجعت بالسلامة، بعدين ماعرفت كيف اروح اسال عنها، قلت بدال مااروح خليني اتصل على الشرطة تاني ههههههههههه
دقيت على رقمهم من قوقل عشان الرقم يلي شفتوا هنا كان غلط بس التحويلة صح

قالت لي معاملتك من زمان راحت المحافظة روحي شيكي عندهم، توكلت على الله ورحت المحافظة في طريق المدينة بعد ارامكوا، اعطيتها الرقم والتاريخ شيكت على الكمبيوتر وقالت لي معاملتك في الامارة ( المحافظة والامارة في ظهر بعض الحمدلله، يعني ماياخد وقت او مشوار عشان تروحوا الاثنين)

وطبعت لي ورقة زي الفاتورة في رقم القيد ودي الحاجات عشان اراجع الامارة.   هذا كان بتاريخ ٣٠/٣/١٤٤١

رحت الامارة قسم النساء، واعطيهم الورقة يلي اخدتها من المحافظة، ويلي عند الاستقبال اتصلت على احد واخذت بيانات، وقالت لي هادي ورقة مراجعة لمحكمة الاحوال الشخصية بحي الورورد.

ملاحظة مهمة * محكمة الاحوال الشخصية يلي توصل لها الموافقات ليست بحي الورود بل بطريق الملك صواري لاند مارك سابقا، قبل الردسي ممول*
الحمدلله اني مارحت مشوار طويل لحي الورود

وبكدة الحمدلله تكون طلعت الموافقة عقبالكم اجمعين يارب. حقيقي كله خير وتوفيق من ربنا ابدا ماتوقعت انها تخلص كدة بسرعة
بعد مارحت المحكمة، قالي بس جيبي صورة لهوية ولي الامر و اصل الفحص الطبي، لان في بداية المعاملة فقط ياخدو الصورة والاصل يبقى معاك، وخلاص على طول يحدد معاك وقت كتابة العقد، مع ٢ شهود فقط وعادي باي جنسية


رح اكتبلكم تواريخ كل معاملة متى وصلت الجهة زي يلي واضح عندي في الاوراق * ولازم تخلوا في بالكم انها بعد ماتوصل الجهة تروحوا لها بعد ١٠ ايام عشان تكون دخلت السستمم*
وترى مو لازم تجيكم رسالة انها انتقلت من جهة لجهة حتى الاون لاين انا عندي ماتغيرت الحالة ابدا، افضل شي تعملوا كل شي بنفسكم وتجتهدوا، وحقيقي كل معاملة تختلف عن الثانية، خلوا ايمانكم في ربنا كبير واسعووا في كل شي بنفسكم نصيحة.

١-تقديم المعاملة كاملة للشرطة بتاريخ : ٢٧/١/١٤٤١
٢- المعاملة في محافظة جدة: ٢٣/٢/١٤٤١
٣- صدرت الى الامارة: ٢٨/٢/١٤٤١
٤- صدرت للمحكمة: ٢١/٣/١٤٤١

زي ماقلت لكم تروحوا للجهة بعد التاريخ يلي تصدر منه ب ١٠ أيام.

أتمنى اكون افدتكم بتجربتي المتواضعة الحمدلله، ربي يوفقكم ويسرلكم ويسهلكم اموركم يارب ودايما نسمع اخبار جميلة

استودعتكم عند الله
تم التعليق عليه بواسطة مستخدم جديد (11.1ألف نقاط)
الف مبروك وبالرفاة والبنين
من فضلك عندي استفسار
كيف اقدر اعدل المهنه بالاحوال .. في ابشر ما في خيار موعد للتعديل
مع الاوضاع الحاليه هل اقدر اروح لهم بدون موعد لتعديل المهنه فقط؟ او اقدر اعدلها وقت ما اطلب البرنت؟
تم التعليق عليه بواسطة مستخدم جديد (18.1ألف نقاط)
ماشاء الله الف مبروك بس عندي سؤال
ايش موضوع الاستجواب ؟
يعني هل نادو على زوجك عشان يعملو معاه استجواب
وايش يسألوه وايش جاوب
وايش الهدف منه
تم التعليق عليه بواسطة مستخدم جديد (1.1ألف نقاط)
الف الف مبروك
بسلك اختي انا حالتي في الانلاين ماتغيرت ابي اطمن اخاف معاملتي واقفه... عادي ماتطلع نتيجه بالانلاين لازم اروح وسال بنفسي
تم التعليق عليه بواسطة مستخدم جديد (36.1ألف نقاط)
تقصدي الحالة في موقع الداخلية ؟! هيا في اي قسم و ايش الحالة اللي مكتوبة
تم التعليق عليه منذ بواسطة (100 نقاط)
السلام عليكم
ابي اسألك و ان شاء الله تردين
انا بتزوج اجنبي غير مقيم ومابيننا اي صلة هل من الممكن يرفضون المعاملة عشانه مو مقيم بالسعودية؟ مرررة شايلة هم ):

4 إجابة

0 تصويتات
تم الرد عليه بواسطة مستخدم جديد (28.2ألف نقاط)
ماشاء الله تبارك الله
الف مبروك اختي بارك الله لكما وبارك عليكما وجمع بينكما في خير

افرح لما اقرا مواضيع زي كذا بحس الأمور الحمدلله سهالات

وأكثر شي فرحني انو معاملتك فقط كانت بثلاث شهور او شهرين ماشاء الله
مرات اخاف أطول اكثر من سنه
لكن ان شاء الله ربي يسهل عالجميع

انا خطيبي سوري وغير مولود بالسعوديه ومعاه فيزا زياره
وجوازه منتهي
الله يعين يبيلنا نجدد الاوراق من اول وجديد بعدين نتوكل على الله ونقدم
احس اهم شي الأوراق لازم تكون كامله وبإذن الله الامور بتتسهل
الله يسخر لنا عباده الصالحين اللي مايوقفون بطريق احد

شكرا لك اختي كثير على كتابة قصتك عقبالي ان شاء الله اجي واكتب كل التفاصيل

الله يحفظكم ويتمم عليكم الفرحه
تم التعليق عليه بواسطة مستشار أول (171ألف نقاط)
الله يبارك فيك يارب ويسهل لك امورك كلها.
أيوة اهم شي قبل تروحي تكون كل الاوراق عندك كاملة، ولمن تقدمي المعاملة كل الاوراق تجهزيها زي ماطلبوا عشان لاترجع او تنرفض ويقولك قدميها من أول وجديد. لازم تكون فيها كل الاختام المطلوبة.

باليقين والدعاء كل شي يتسهل ويتيسر باذن الله، وان شاءالله برضوا ماتطول معاملتك انا كنت حاطة في بالي ٥ شهور اقل حاجة.
لكن قرأت انو يفرق لمن يكون مواليد هنا او لا، يعني اذا ماكان مواليد هنا تروح أمارة الرياض و وزارة الخارجية فيكون الوقت غالبا زيادة شهرين.
ربي يوفقك وييسرلك امورك وباذن الله تكتبي تجربتك
0 تصويتات
تم الرد عليه بواسطة مشارك متقدم (83.3ألف نقاط)
عُدل بواسطة
ماشاء الله تبارك الله .. الله يسعد قلبك
بارك الله لكما و بارك عليكما و جمع بينكما في خير
كفيتي و وفيتي ماشاء الله
استغربت بس انهم ماطلبوا شهادة ميلادك
كانت مطلوبة و حتى افتكر الناس كانت تكتب تجاربها في تعبهم عشان يصدقوا شهادة الميلاد مابين وزارة الصحة الفرع اللي خلف مركز الدرن في كيلو 7 و الاحوال المدنية
و يقولوا وجود ولي الأمر مهم يأخذوا موافقته مبصوم عليها  لما تروحي للشرطة تأخذي الورقة اللي فيها الطلبات
طيب و الورق اللي اتختم من عمدة الحي  برضوا روحتي بنفسك ما قالك لازم ولي الأمر بنفسه ؟ يعني انت ما احتجتي ولي الأمر الا وقت العقد في المحكمة
على العموم ما قصرتي بارك الله فيك و تنبيهاتك و ملاحظاتك الصغنونة قيّمة جزاك الله كل خير
العقبى لنا اللهم آمين الله يسهل على الجميع
تم التعليق عليه بواسطة مستشار أول (171ألف نقاط)
اللهم امييين يارب الله يسعدك يارب.

معظم التجارب يلي قراتها شخصيا وكانت كاملة ومفصلة تقريبا كانت ٢٠١٥ فكل الطلبات والبيانات قديمة.
طلبوا صورة لشهادة ميلاد الخاطب عشان اثبات انه مواليد السعودية.

ولي أمري كان معايا فقط لمن رحنا العمدة مع الشهود لاثبات اني ربه منزل فقط، لكن الشرطة، جميع المرافق الحكومية يلي رحتها كان انا بنفسي باروح واسال واكمل اموري الحمدلله.

ويوم رحت المحكمة اول مرة عشان اشوف المطلوب واعمل موعد للحجز برضوا كان بنفسي، المرة الثانية لمن رحت نعقد كان معايا اكيد والحمدلله تم الزواج.

يعني مايحتاج البنت تشيل هم اذا والها عندو شغل او كبير في السن كل شي تقدري تعملي بنفسك
تم التعليق عليه بواسطة مستشار أول (174ألف نقاط)
الحمدلله الله يتمم عليكي يارب ويحفظكم لبعض ويجعلها ربي زواجة الدهر
يارب تشوفي سؤالي ابغا اسالك الله يسعدك لاني مره احس نفسي تايهة، والدك يحتاج يسوي شي يعني يرفع طلب في ابشر يكتب معروض اي شي؟ احس اني ضايعه كل شويا اقرا كلام مختلف ومني عارفه الوالد ايش المطلوب منه يسوي بالضبط :(
تم التعليق عليه بواسطة مستخدم جديد (10.1ألف نقاط)
ما شاء الله تبارك الله
ألف ألف مبروك ربنا يتمم لكم على خير
عندي استفسار بخصوص لو الخاطب الأجنبي كان حامل لفقر الدم والمخطوبة السعودية سليمة كيف ممكن تتم المعاملة
0 تصويتات
تم الرد عليه بواسطة مستخدم جديد (37.1ألف نقاط)
ما شاء الله تبارك الله
ألف مبارك ي عروسة  
الله يتمم لك بخير
بسألك ما طلبوا منكم شهود غير حقين العمدة؟
تم التعليق عليه بواسطة مستشار أول (171ألف نقاط)
الله يبارك فيك ويسعدك ياررب ويسمع منك.

الخاطبة فقط اذا كانت ربة منزل تحتاج شهود سعوديين ٢ عند العمدة اثبات انها ربة منزل

والخاطب يحتاج شهود سعوديين ٢ عند العمدة اثبات انه لم يسبق له الزواج من سعودية

ويوم العقد في المحكمة ان شاءالله تحتاجوا شاهدين فقط سعودين او مقيمين مايفرق
0 تصويتات
تم الرد عليه بواسطة مستخدم جديد (10.1ألف نقاط)
ماشاء الله لاقوة الا بالله ... احيي اصرارك وقوة عزيمتك .. انا والله لسى جديدة على الوضع واحس شلت همم كبير والله  المهم الله ييسر ... اتمنى لكم كل التوفيق والسعادة يارب
...
كان عندي سؤال وانا اقرأ القصة ، هل هذه الخطوات تنطبق حتى على الخاطب الاجنبي من خارج السعودية ؟ يعني ما انولد هنا
لاني شفت شروط للاعمار واحد يقول اكثر من ٢٥ والثاني ٣٥ ما اعرف امشي مع ايش .. يا ليت اذا تعرفين الاجابة تقولين لي وشكرا لك مقدما ❤️❤️
تم التعليق عليه منذ بواسطة (100 نقاط)
من 25 ورايح اهم شي مايتعدى عمره 50 سنه والله يوفق الجميع يارب ياكريم @
مرحبًا بك إلى مجتمع أبناء السعوديات - سؤال وجواب، حيث يمكنك طرح الأسئلة وانتظار الإجابة عليها من المستخدمين الآخرين. Untitled 1

يمكنكم الانضمام في مجموعة أبناء السعوديات على برنامج التليجرام عبر الرابط التالي:  https://t.me/mhananah

12.2ألف أسئلة

23.7ألف إجابة

26.6ألف تعليقات

16.4ألف مستخدم

...